قازاقستان ەكىنشى اتوم ەلەكتر ستانتسياسىن سالۋ ماسەلەسى بويىنشا الەۋەتتى جەتكىزۋشىلەرمەن كەلىسسوزدەر جۇرگىزىپ جاتىر. بۇل تۋرالى اتوم ەنەرگياسى اگەنتتىگى توراعاسىنىڭ ورىنباسارى عۇمار سەرعازين ماگاتە باس كونفەرەنتسياسىنىڭ 70-سەسسياسىندا مالىمدەدى، دەپ حابارلايدى «ادىرنا» ءتىلشىسى.
ايتۋىنشا، ۇلتتىق يادرولىق باعدارلاما اياسىندا ءبىرىنشى اتوم ەلەكتر ستانتسياسىنىڭ قۇرىلىسىنا دايىندىقپەن قاتار، ەكىنشى اەس-ءتى سالۋ پەرسپەكتيۆالارى دا تالقىلانۋدا.
«يادرولىق باعدارلامانى ىسكە اسىرۋ شەڭبەرىندە ءبىرىنشى اەس قۇرىلىسىن باستاۋعا دايىندىق جۇرگىزىلۋدە. سونىمەن قاتار ەكىنشى اتوم ەلەكتر ستانتسياسىن سالۋ ماسەلەسى بويىنشا الەۋەتتى جەتكىزۋشىلەرمەن كەلىسسوزدەر جالعاسىپ جاتىر»،–دەدى سەرعازين.
سونداي-اق ول پرەزيدەنت قاسىم-جومارت توقاەۆتىڭ 2026 جىلعى ساۋىردە بەكىتكەن اتوم سالاسىن 2050 جىلعا دەيىن دامىتۋ ستراتەگياسى زاماناۋي يادرولىق كلاستەر قالىپتاستىرۋدىڭ نەگىزىنە اينالۋى ءتيىس ەكەنىن اتاپ ءوتتى.
قۇجاتتا اتوم ەنەرگەتيكاسىمەن قاتار وعان بايلانىستى ونەركاسىپتى، عىلىمدى، ءبىلىم بەرۋ جۇيەسىن جانە جوعارى تەحنولوگيالىق ءوندىرىستى دامىتۋ كوزدەلگەن.
