اتىراۋدا ۇلتتىق ۇلان اسكەري قىزمەتشىسى تۇزەۋ مەكەمەسىنىڭ ماڭىنان ىشىندە كۇدىكتى زات سالىنعان وراماسى بار دروندى انىقتادى، دەپ حابارلايدى "ادىرنا" ءتىلشىسى.
ۇلتتىق ۇلاننىڭ ءباسپاسوز قىزمەتىنىڭ مالىمەتىنشە، وقيعا شامامەن ساعات 08:30-دا بولعان. لەيتەنانت ميراس ىسقاقيەۆ قاج جۇيەسىنە قاراستى №15 مەكەمەدەن ءبىر شاقىرىمداي جەردە جۇرگەن كەزدە جەردەن ۇشقىشسىز ۇشۋ اپپاراتىن بايقاعان. ونىڭ جانىندا وراما جاتقان.
اسكەري قىزمەتشى ورامانى تەكسەرۋ كەزىندە ىشىنەن وسىمدىك تەكتەس، جاسىل ءتۇستى جانە وزىنە ءتان ءيىسى بار 11 پاكەت انىقتاعان.
«اسكەري قىزمەتشى تابىلعان زات تۋرالى كەزەكشى قىزمەت ارقىلى دەرەۋ باياندادى. وقيعا ورنىنا ءتيىستى قاۋىپسىزدىك شارالارى قابىلدانىپ، ودان كەيىنگى جۇمىستار قۇزىرلى ورگاندارعا تاپسىرىلدى»، – دەلىنگەن ۇلتتىق ۇلان حابارلاماسىندا.
تابىلعان زاتتىڭ ناقتى قۇرامى مەن ونىڭ درون ارقىلى قانداي ماقساتتا جەتكىزىلگەنى انىقتالىپ جاتىر.
