باتىس قازاقستان وبلىسىنىڭ پوليتسيا ءبولىمىننىڭ باقىلاۋ-وتكىزۋ بەكەتىندە پوليتسەي ابايسىزدا قىزمەتتىك قارۋىمەن ءوزىن اتىپ العان. بۇل تۋرالى باتىس قازاقستان وبلىستىق پوليتسيا ءبولىمى مالىمدەدى، دەپ حابارلايدى “ادىرنا” ۇلتتىق پورتالى.
وبلىستىق پوليتسيا قىزمەتكەردىڭ قازىر جانساقتاۋ بولىمىندە جاتقانىن، ءمان-جايى انىقتالىپ جاتقانىن ايتتى.
"وقيعانىڭ ءمان-جايى انىقتالىپ جاتىر. قازىرگى ۋاقىتتا پوليتسيا قىزمەتكەرى جانساقتاۋ بولىمىندە جاتىر. وزگە مالىمەتتەر، قر قىلمىستىق-پروتسەستىك كودەكسىنىڭ 201-بابىنا سايكەس، جاريالانبايدى", دەلىنگەن حابارلامادا.
دارىگەرلەردىڭ ايتۋىنشا، 2003 جىلى تۋعان ەر ادامنىڭ جاعدايى وتە اۋىر.
باتىس قازاقستان دەنساۋلىق ساقتاۋ باسقارماسى مالىمەتىنشە، 103 پۋلتىنە وق جاراقاتى تۋرالى اقپارات ساعات 07:41-دە تۇسكەن.
"جەدەل مەديتسينالىق جاردەم بريگاداسى 2003 جىلى تۋعان ەر ادامدى وبلىستىق كوپسالالى اۋرۋحاناعا جەتكىزدى. ناۋقاس شۇعىل تۇردە وپەراتسياعا جاتقىزىلدى. قازىرگى ۋاقىتتا ول رەانيماتسيادا. جاعدايى اۋىر", - دەدى بقو دەنساۋلىق ساقتاۋ باسقارماسى وكىلدەرى.
