فوتو: montsame.mn
بۇگىن، 14 قىركۇيەك كۇنى موڭعوليا پرەزيدەنتى ۋحنااگين حۋرەلسۋح بايان-ولگي ايماعىنا جۇمىس ساپارىمەن بارىپ، شىڭعىس حاننىڭ الىپ پورترەتىن رەسمي تۇردە اشتى, دەپ حابارلايدى “ادىرنا”.
پرەزيدەنت ۋحنااگين حۋرەلسۋحتى ايماق ورتالىعىنداعى موڭعوليا باتىرى مازيمىن يكەي اتىنداعى ورتالىق الاڭدا مەملەكەتتىك قۇرمەت قاراۋىلى قارسى الدى.
سالتاناتتى ءراسىم بارىسىندا ەل باسشىسى ۇلتتىق كيىممەن بايان-ولگي ايماعىنىڭ ولگي سۇمىنىنداعى بۋحۋن تاۋىنىڭ باۋرايىندا ورناتىلعان شىڭعىس حاننىڭ الىپ پورترەتىن رەسمي تۇردە اشىپ، ازاماتتارعا ۇندەۋ جاسادى.
شىڭعىس حاننىڭ پورترەتى ۋحنااگين حۋرەلسۋحتىڭ باستاماسىمەن بايان-ولگي ايماعىنىڭ ولگي سۇمىنىنداعى بۋحۋن تاۋىنىڭ بوكتەرىندە جاسالعان.
بايان-ولگي ايماعىنىڭ ورتالىعىندا شىڭعىس حاننىڭ پورترەتىنىڭ بوي كوتەرۋى جەرگىلىكتى تۇرعىندار، بالالار مەن جاستار ءۇشىن ماڭىزدى. بۇل نىسان موڭعوليانىڭ تاريحى مەن مادەني مۇراسىن تەرەڭىرەك تانىپ-بىلۋگە، سونداي-اق ەل تاريحىنا دەگەن ماقتانىش سەزىمىن قالىپتاستىرۋعا ىقپال ەتەدى.
ايتا كەتسەك، بايان-ولگي – موڭعوليانىڭ باتىسىندا ورنالاسقان اكىمشىلىك-اۋماقتىق بىرلىك. ايماق قازاقستان، قىتاي جانە موڭعوليانىڭ باسقا وڭىرلەرىمەن شەكتەسەدى. ءوڭىردىڭ اكىمشىلىك ورتالىعى – ولگي قالاسى.
بايان-ولگي موڭعولياداعى قازاقتار ەڭ كوپ شوعىرلانعان ايماق رەتىندە بەلگىلى. مۇندا قازاق حالقىنىڭ ءتىلى، سالت-ءداستۇرى مەن مادەنيەتى كەڭىنەن ساقتالعان. ايماق تۇرعىندارىنىڭ باسىم بولىگىن قازاقتار قۇرايدى، سوندىقتان بايان-ولگي موڭعولياداعى قازاق دياسپوراسىنىڭ مادەني ورتالىقتارىنىڭ ءبىرى سانالادى.
