ۇلىبريتانيا كارولى ءىىى چارلزدىڭ العاشقى رەسمي پورترەتى جەلىدە تالقىلاۋ تاقىرىپتارىنىڭ بىرىنە اينالدى، دەپ حابارلايدى “ادىرنا” ۇلتتىق پورتالى.
سۋرەتشى دجوناتان يەو مونارحتى قىزىل جانە قىزعىلت رەڭكتەرمەن بەينەلەگەن. سوندىقتان جۇرتشىلىق كارتيناعا «قاندى» دەگەن لاقاپ ات قويعان.
اعىلشىن كورولدىك وتباسى III كارلدىڭ ءتاج كيگەننەن كەيىنگى پورترەتىن كورسەتتى. سۋرەتتىڭ رەسمي كورسەتىلىمى بۋكينگەم سارايىندا ءوتتى.
بريتاندىق سۋرەتشى دجوناتان يەو 75 جاستاعى مونارحتى ۋەلس گۆاردياسىنىڭ كيىمىندە بەينەلەگەن.
فوتو: ينستاگرام (The Royal Family)
سۋرەتتە ءىىى چارلزدىڭ ءجۇزى مەن قولى شىنايى سۋرەتتەلگەنىمەن، سۋرەتشى جاڭاشىل يدەيالارعا ەرىك بەرگەن. قالىڭ شتريحتارداعى قىزىل فورما «قاندى» فونمەن بىرىكتىرىلەدى جانە مونارحتىڭ يىعىنا كوبەلەكتىڭ ۇشىپ كەلە جاتقان سۋرەتى سالىنعان.
دجوناتان يەو ۆەب-سايتىندا ايتىلعانداي، سۋرەتشى ءوزىنىڭ قولتاڭبا ستيلىندە ەرەكشە پورترەتتى سالعان. ول ولاردىڭ سىرتقى ءتۇرى مەن اينالاسىنداعى نىسانداردى سوزبە-ءسوز كوشىرۋگە ەمەس، ولاردىڭ سيپاتىن بەرۋگە باسا نازار اۋدارادى. يەو سۋرەتكە ديناميزم بەرىپ، ءداستۇرلى وتكەن مەن قازىرگى زامانعى ۇردىستەر اراسىنداعى قاراما-قايشىلىقتى كورسەتكىسى كەلگەن. ال كوبەلەك ءىىى چارلزدىڭ جاڭا ءرولىن، سونداي-اق قورشاعان ورتانى قورعاۋدى بىلدىرەدى ەكەن.
كورولدىك اككاۋنت بۋكينگەم سارايىندا كارتينانىڭ سالتاناتتى تۇساۋكەسەرى تۋرالى بەينەنى جاريالادى. دەگەنمەن، سۋرەت ينتەرنەت قولدانۋشىلارىن بەي-جاي قالدىرماعانى ءسوزسىز. دجوناتان يەونىڭ كارتيناسى توڭىرەگىندە قىزۋ پىكىرتالاس ءجۇرىپ جاتىر.
كەيبىرەۋلەر كارتينانى پروگرەسسيۆتى جانە ودان مونارحياعا جاڭا كوزقاراستى كورۋگە بولادى دەسە، ال باسقالارى پورترەتتى قورقىنىشتى دەپ اتايدى. قىزىل ءتۇستىڭ كوپتىگى كورەرمەندەردى مازاسىزداندىراتىنىن دا جاسىرمايدى.
كوممەنتاتورلار سۋرەتتە ء“ىىى چارلز توزاقتان شىققان نەمەسە قانعا شومىلعان سەكىلدى” دەپ جازۋدا. كەي ينتەرنەت قولدانۋشىلارى پورترەتتە يمپەرياليزمنىڭ «قاندى ءىزى» بار دەيدى.
