لاۆروۆتىڭ ماڭدايىنا تيگەن سوققى. وزبەكستان سىنعا جاۋاپ بەردى

وزبەكستان رەسەي ءمينيسترىنىڭ ەۋروپالىق وداق ساياساتىن سىناعانىنان كەيىن مالىمدەمە جاسادى، دەپ حابارلايدى “ادىرنا” ۇلتتىق پورتالى. وزبەكستان پرەزيدەنتىنىڭ سىرتقى ساياسات جونىندەگى ارنايى وكىلى كاميلوۆتىڭ ايتۋىنشا، بۇگىندە ورتالىق ازيا ايماعى حالىقارالىق قاۋىمداستىق الدىندا دەربەس ءارى ءبىرتۇتاس سۋبەكت رەتىندە تانىلىپ وتىر. ونىڭ سوزىنشە، “ورتالىق ازيا +” فورماتىنداعى حالىقارالىق ارىپتەستىك الاڭدارىنىڭ سانى وننان اسىپ كەتكەن. سونىڭ ءبىرى – جۋىردا سامارقاندا وتكەن “ەۋروپالىق وداق + ورتالىق ازيا” ءسامميتى. سامميت قورىتىندىسى بويىنشا ستراتەگيالىق سەرىكتەستىك تۋرالى دەكلاراتسيا قابىلدانعان. ء“بىزدىڭ ساياسات – پراگماتيكالىق. ەو-دا 28 مەملەكەت، جالپى ىشكى ءونىمى 19 ترلن دوللاردان اسادى. مۇنداي مۇمكىندىكتى پايدالانۋ – ءبىز ءۇشىن دە ءتيىمدى. سوندىقتان بۇل بىرەۋگە ۇناي ما، ۇناماي ما – ءبىز ءبارىبىر ىنتىماقتاستىقتى جالعاستىرامىز”، – دەدى كاميلوۆ. بۇل مالىمدەمە رەسەي سىرتقى ىستەر ءمينيسترى سەرگەي لاۆروۆتىڭ ەو ساياساتىن سىناعانىنان كەيىن جاسالدى. وزبەكستاننىڭ وكىلى ورتالىق ازيانى ءوزارا تاتۋلىق پەن تاتۋ كورشىلىك ارقىلى دامىپ جاتقان ءوڭىر رەتىندە سيپاتتاپ، باسقا ايماقتارعا ۇلگى بولا الاتىنىن ايتتى. وزبەكستان پرەزيدەنتى شاۆكات ميرزيەەۆتىڭ دە بۇۇ باس اسسامبلەياسىنىڭ 78-سەسسياسىندا وسى يدەيانى كوتەرگەنىن ەسكە سالدى. ايتا كەتەيىك، 4 ءساۋىر كۇنى سامارقاندا العاش رەت “ورتالىق ازيا – ەو” ءسامميتى ءوتتى. وندا تاراپتار ستراتەگيالىق ارىپتەستىككە كوشۋگە كەلىسىم جاساسقان. ەۋروپالىق كوميسسيا ءتورت باسىم باعىتقا، سونىڭ ىشىندە ترانسكاسپي كولىك ءدالىزىن دامىتۋعا 10 ملرد ەۋرو باعىتتاۋدى قوسا العاندا، بارلىعى 12 ملرد ەۋرو كولەمىندە قارجىلاي كومەك كورسەتەتىنىن مالىمدەدى. ارادا ەكى اپتا وتكەندە رەسەيدىڭ سىرتقى ىستەر ءمينيسترى سەرگەي لاۆروۆ سامارقانعا رەسمي ساپارمەن كەلىپ، ەو-نىڭ ايماققا قاتىستى ساياساتىن سىنادى. ول باتىس ەلدەرى انتيرەسەيلىك كۇن ءتارتىبىن ىلگەرىلەتىپ جاتىر دەپ اتاپ ءوتتى. “كەيبىر ارىپتەستەر، اسىرەسە باتىس ەلدەرى، ءوزارا ءتيىمدى جوبالاردى ۇسىنعاننان گورى، ورتالىق ازيا ەلدەرىنىڭ ىشكى قۇرىلىمىنا ەنۋگە باعىتتالعان باعدارلامالارعا قارجى ءبولۋ ارقىلى ءوز مۇددەلەرىن العا تارتۋعا تىرىسۋدا”، – دەدى لاۆروۆ. رەسەي تارابى وڭىردەگى سەرىكتەستىك پروتسەستەرىنىڭ ساياسيلانۋىنا جانە يدەولوگيالىق ۇستەمدىك ورناتۋعا قارسى ەكەنىن مالىمدەگەن بولاتىن.