«كوشپەندىلەر ويىندارى» حالىقارالىق كىتاپ بايقاۋىندا ءبىرىنشى ورىن الدى

ARMAN-PV باسپاسىنان جارىق كورگەن قىمبات قاراەۆانىڭ «كوشپەندىلەر ويىندارى» كىتابى مينسك قالاسىندا وتكەن XXIII «يسكۋسستۆو كنيگي – 2026» حالىقارالىق بايقاۋىندا ءبىرىنشى ورىن يەلەندى. باسىلىم «مويا سترانا» نوميناتسياسى بويىنشا ۇزدىك دەپ تانىلدى.

وتاندىق كىتاپتاردىڭ حالىقارالىق كەڭىستىكتە تانىلۋىنا قر مادەنيەت جانە اقپارات مينيسترلىگىنىڭ قولداۋى مەن كىتاپ سالاسىن دامىتۋعا باعىتتالعان جۇيەلى جۇمىسى ايرىقشا ىقپال ەتىپ وتىر. قازاقستاندىق باسىلىمداردى حالىقارالىق الاڭداردا تانىستىرۋ ىسىنە مينيسترلىك جۇيەسىندەگى ۇلتتىق مەملەكەتتىك كىتاپ پالاتاسى دا بەلسەندى اتسالىسىپ كەلەدى.

«كوشپەندىلەر ويىندارى» كىتابى قازاق حالقىنىڭ ءداستۇرلى ويىندارىن، ولاردىڭ تاريحي نەگىزىن، مادەني مازمۇنى مەن تاربيەلىك ءمانىن كەڭىنەن تانىستىرۋعا ارنالعان. باسىلىم ۇلتتىق مۇرانى زاماناۋي كىتاپ فورماتى ارقىلى جاڭا بۋىن وقىرمانىنا جەتكىزۋدى ماقسات ەتەدى.

قازاقستان اتالعان بايقاۋدا جوعارى ناتيجە كورسەتتى. وتاندىق باسىلىمدار جالپى توعىز جۇلدەلى ورىنعا يە بولدى. ونىڭ ىشىندە ەكى كىتاپ ءبىرىنشى، ءتورت باسىلىم ەكىنشى، ءۇش كىتاپ ءۇشىنشى ورىن يەلەندى.

ءبىرىنشى ورىن العان تاعى ءبىر قازاقستاندىق ەڭبەك — كەنجەحان ماتىجانوۆتىڭ «اباي» ءۇش تومدىعى. باسىلىم «ناۋكا ي وبرازوۆانيە» نوميناتسياسىندا ۇزدىك دەپ تانىلدى.

ەكىنشى ورىن ەرلان قوجاباەۆتىڭ «قازاق ويۋلارى»، نەللي بۋبەنىڭ «اماندوس اقاناەۆتىڭ عالامى. سۋرەتشىلەر اۋلەتى»، كادىربەك سەگىزبايۇلىنىڭ «قازاقى داستارحان» جانە ايدارحان جادىكوۆتىڭ «گەروي-كازاحستانتسى. كراتكي بيبليوگرافيچەسكي سپراۆوچنيك» كىتاپتارىنا بۇيىردى.

ءۇشىنشى ورىن مارات ءازىلحانوۆتىڭ «ۆەتەرانى اسسامبلەي نارودا كازاحستانا»، سەيىت كەنجەاحمەتۇلىنىڭ «قازاقتىڭ سالت-داستۇرلەرى مەن ادەت-عۇرىپتارى» جانە بايانعالي ءالىمجانوۆتىڭ «ابىلاي حان مەن باتىرلار» ەڭبەكتەرىنە بەرىلدى.

سونىمەن قاتار گۇلميرا اماندىقوۆانىڭ «اباي قۇنانبايۇلىنىڭ قارا سوزدەرى. ۇرپاققا ۇلاعات» كىتابى نومينانت ديپلومىمەن ماراپاتتالدى. ءا. دۇزەلحانوۆتىڭ «مومۋنباي ي سەمەرو رازبوينيكوۆ. پو موتيۆام كازاحسكوي نارودنوي سكازكي»، ماكسيم زۆەرەۆتىڭ «زولوتوي سايگاك» جانە جۇسىپبەك قورعاسبەكتىڭ «كەلنداعى كوكجال» كىتاپتارى ارنايى ديپلومدارعا يە بولدى.

جالپى قازاقستان XXIII «يسكۋسستۆو كنيگي – 2026» حالىقارالىق بايقاۋىنىڭ نەگىزگى نوميناتسيالارىنا 10 كىتاپ، ارنايى ديپلومدارعا ءۇش باسىلىم ۇسىندى.

«كوشپەندىلەر ويىندارى» كىتابىنىڭ حالىقارالىق دەڭگەيدە جوعارى باعالانۋى ۇلتتىق مادەني مۇرانى ساپالى باسپا ءونىمى ارقىلى الەمدىك وقىرمانعا تانىتۋدىڭ ماڭىزدى ناتيجەلەرىنىڭ ءبىرى بولدى.