Prezident Qasym-Jomart Toqaev Qytaidyŋ «Sinhua» agenttıgıne bergen sūhbatynda Alatau City jobasynyŋ strategiialyq maŋyzyna toqtaldy, dep habarlaidy «Adyrna» tılşısı.
Memleket basşysynyŋ aituynşa, joba jaŋa ekonomikalyq jäne tehnologiialyq ortany qalyptastyruǧa baǧyttalǧan.
«Alatau City jobasyna erekşe köŋıl bölıp otyrmyz. Būl – bıregei ekonomikalyq jäne tehnologiialyq ekojüie qalyptastyruǧa baǧyttalǧan bastama. Atalǧan joba aiasynda sifrlyq şeşımder men jasandy intellekt qala basqaruyna, kölık jüiesıne, energetikaǧa, bılım beru salasyna jäne qoǧamdyq qyzmetterge keŋınen engızıledı», – dedı prezident.
Qasym-Jomart Toqaev Qazaqstan jobany ıske asyru barysynda halyqaralyq täjıribenı zerttegenın atap öttı.
«Bız halyqaralyq täjıribenı mūqiiat zerttedık. Sonyŋ ışınde bırneşe onjyldyq ışınde joǧary tehnologiialardyŋ ırı ortalyǧyna ainalǧan Şenchjen qalasynyŋ jetıstıgı erekşe nazar audartady», – dedı ol.
Prezidenttıŋ sözınşe, qytailyq kompaniialar Qazaqstandaǧy joǧary tehnologiialyq bastamalardy jüzege asyruǧa belsendı qatysa alady.
«Qytai kompaniialarynyŋ Qazaqstandaǧy osyndai jobalardy jüzege asyruǧa eleulı üles qosatynyna senemın. Aldaǧy jyldary ekı el mäŋgı ärı jan-jaqty strategiialyq ärıptestıktıŋ jaŋa joǧary tehnologiialyq baǧytyn qalyptastyra alady dep kämıl senemın», – dedı memleket basşysy.
Odan bölek, Qasym-Jomart Toqaev biyl Almatyda ötetın maŋyzdy ekonomikalyq ıs-şaraǧa nazar audardy.
«25 qyrküiekte Almaty qalasynda ötetın «Qazaqstan – Qytai» investisiialyq forumyn erekşe atap ötkım keledı. Jaŋa ekonomikalyq jäne investisiialyq jobalardy ıske qosuǧa arnalǧan maŋyzdy alaŋǧa ainalatyn būl forumǧa qatysudy josparlap otyrmyn», – dedı ol.
