قازاقستان مەن قىتاي اراسىنداعى ەكونوميكالىق ىنتىماقتاستىق قارقىندى دامىپ كەلە جاتىر. بۇل تۋرالى پرەزيدەنت قاسىم-جومارت توقاەۆ قىتايدىڭ سينحۋا اقپارات اگەنتتىگىنە بەرگەن ەكسكليۋزيۆتى سۇحباتىندا ايتتى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ سوزىنشە، بۇگىندە قازاقستان اۋماعىندا قىتاي كاپيتالىنىڭ قاتىسۋىمەن قۇرىلعان 9 مىڭنان استام كومپانيا تابىستى جۇمىس ىستەپ جاتىر.
«بۇل – ەلىمىزدەگى شەتەلدىك كاسىپورىنداردىڭ شامامەن ءاربىر جەتىنشىسى دەگەن ءسوز. ولاردىڭ قاتارىندا CNPC, CITIC, Huawei سەكىلدى ءىرى كورپوراتسيالار بار. ال قازاقستان مەن قىتاي اراسىنداعى ونەركاسىپتىك كووپەراتسيا جالپى ينۆەستيتسيا كولەمى 62 ميلليارد دوللاردان اساتىن 260 جوبانى قامتيدى»،–دەدى پرەزيدەنت.
ايتۋىنشا، ماشينا جاساۋ سالاسى — ىنتىماقتاستىقتىڭ ەڭ قارقىندى دامىپ كەلە جاتقان باعىتتارىنىڭ ءبىرى.
«ەلىمىزدە بۇگىندە BYD, Howo, Yutong, Golden Dragon, Shacman, JAC, Jetour جانە باسقا دا برەندتەردىڭ ونىمدەرى شىعارىلادى. ال وتكەن جىلى Changan, Great Wall Motor جانە Chery جەڭىل اۆتوكولىكتەرىن سەريالىق ءوندىرۋ جولعا قويىلدى»،– دەدى ول.
قاسىم-جومارت توقاەۆ مەتاللۋرگيا سالاسىنداعى ارىپتەستىككە دە توقتالدى. ونىڭ سوزىنشە، «Qarmet» اكتسيونەرلىك قوعامى وندىرىستىك قۋاتتاردى جاڭعىرتۋ، تەحنولوگيالىق تيىمدىلىكتى ارتتىرۋ جانە نەگىزگى قورلاردى جاڭارتۋ باعىتىندا جەتەكشى قىتايلىق كومپانيالارمەن بىرلەسكەن جۇمىستار جۇرگىزىپ كەلەدى.
سونىمەن قاتار پرەزيدەنت جاسىل ەنەرگەتيكا سالاسىنداعى جوبالاردىڭ دا ناتيجەلى جۇزەگە اسىپ جاتقانىن جەتكىزدى. بۇگىندە قىتايلىق ينۆەستورلاردىڭ قاتىسۋىمەن جالپى قۋاتى شامامەن 1,5 گۆت بولاتىن 29 جوبا ىسكە اسىرىلعان. بۇدان بولەك، جيىنتىق قۋاتى 1,7 گۆت-تان اساتىن تاعى 11 جوبا جۇزەگە اسىرۋ كەزەڭىندە تۇر.
