جەتىسۋ مەملەكەتتىك ۋنيۆەرسيتەتى بازاسىندا يتاليالىق جوعارى وقۋ ورنىنىڭ فيليالى اشىلادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى، دەپ حابارلايدى “ادىرنا”.
«بۇگىن جاريالاناتىن ەڭ ۇلكەن ناتيجە – بيىل جەتىسۋ مەملەكەتتىك ۋنيۆەرسيتەتىنىڭ نەگىزىندە تۇڭعىش يتاليالىق جوعارى وقۋ ورنىنىڭ فيليالى اشىلادى. ول انكانو قالاسىنداعى Politécnica delle Marche دەپ اتالاتىن ۋنيۆەرسيتەت. وتە مىقتى اگرونوميا، اۋىل شارۋاشىلىعى سالاسىنداعى ۋنيۆەرسيتەت. ۋاقىتىندا يتاليادا Parmalat دەگەن اتاقتى ءسۇت شىعاراتىن كومپانيا بولعان. وسى ۋنيۆەرسيتەت سونىڭ نەگىزگى كادر دايارلايتىن جانە زەرتتەۋشى كۇشى بولاتىن. بيىل ءبىز ءتورت باعدارلامامەن باستايمىز: اگرونوميا، سەلەكتسيا، اۋىل شارۋاشىلىعى جانە ەڭ باستىسى اۋىل شارۋاشىلىعى ونىمدەردىڭ تەحنولوگياسى»، - دەدى ساياسات نۇربەك اقوردا كۋلۋارىندا.
مينيستر يتاليا ەۋروپادا دا، جالپى الەم بويىنشا دا اۋىل شارۋاشىلىعى سالاسىنداعى جەتەكشى ەل ەكەنىن اتاپ ءوتتى.
«سوندىقتان وسى جىلدان باستاپ ەڭ مىقتى پروفەسسورلار جەتىسۋدا ساباق بەرەتىن بولادى. سوعان قوسىمشا La Sapienza ۋنيۆەرسيتەتى اشىلادى. مەن 2004 جىلى سونى بىتىرگەنمىن جانە Politecnico di Milano, ميلاننىڭ پوليتەحنيكالىق ۋنيۆەرسيتەتىمەن كەلىسسوز جۇرگىزىپ جاتىرمىز. قىركۇيەك ايىندا يتاليا پرەزيدەنتىنىڭ ۇلكەن ساپارى جوسپارلانىپ وتىر. سول جەردە ۇلكەن جاڭالىقتاردى جاريالايمىز»، - دەپ سەندىردى ۆەدومستۆو باسشىسى.
ايتا كەتەيىك، بۇگىن اقوردادا پرەزيدەنت قاسىم-جومارت توقاەۆ ەلىمىزگە رەسمي ساپارمەن كەلگەن يتاليا مينيسترلەر كەڭەسىنىڭ توراعاسى دجوردجا مەلونيدى سالتاناتتى تۇردە قارسى الدى.
ۇقساس جاڭالىقتار
