الەمدى الاڭداتىپ وتىرعان كوروناۆيرۋس ىندەتىنە بايلانىستى شىمكەنت قالاسىندا ساقتىق شارالارى بارىنشا كۇشەيتىلۋدە. قاۋىپتى ىندەتتىڭ الدىن الۋ ماقساتىمەن حالىق اراسىندا تۇسىندىرمە جۇمىستارى جۇرگىزىلۋدە.
مىسالى، شىمكەنت قالاسىنىڭ اكىمدىگى قۇزىرلى ورگان قىزمەتكەرلەرىمەن بىرلەسىپ، ادام قاراسى كوپ جەرلەردە دىبىس كۇشەيتكىش قۇرالدىڭ كومەگىمەن COVID-19 اۋرۋىنان ساقتانۋ بويىنشا اقپاراتتار بەرۋدە.
وسىعان بايلانىستى، «شىمكەنت سيتي» شاعىناۋدانىنداعى 9 قاباتتى 16 تۇرعىن ءۇيدىڭ اۋلاسىندا قاۋىپتى ىندەتتىڭ الدىن الۋ بويىنشا ۇگىت-ناسيحات جۇمىستارى جۇرگىزىلدى.
سونداي-اق تۇسىندىرمە جۇمىستارى قالانىڭ وزگە دە شاعىناۋداندارىندا جالعاسۋدا. اتاپ ايتساق، «تۇران» شاعىناۋدانىنداعى 9 قاباتتى 13 جانە 5 قاباتتى 16 تۇرعىن ءۇيدىڭ اۋلاسىندا، «اديا» شاعىناۋدانىنداعى 5 قاباتتى 15 تۇرعىن ءۇيدىڭ اۋلاسىندا جانە تولەمەتوۆ كوشەسىنىڭ بويىندا ورنالاسقان 7 قاباتتىق 16 ءۇي، 9 قاباتتىق 9 ءۇي، 5 قاباتتىق 10 تۇرعىن ءۇيدىڭ اۋلاسىندا COVID-19 اۋرۋىنان ساقتانۋ شارالارى تۇرعىندارعا جان-جاقتى ءتۇسىندىرىلدى.
بۇل رەتتە، مەديتسينا ماماندارى قالا تۇرعىندارىنا قاتەرلى ىندەتتىڭ ءالى دە قاۋىپ ءتوندىرىپ تۇرعانىن ەسكەرتەدى. ساقتىق شارالارىنا سالعىرت قاراماي، ادامدار كوپ شوعىرلاناتىن ورىنداردان اۋلاق بولۋىن، قوعامدىق كولىكتەردە، دۇكەندەر مەن قوعامدىق تاعامدانۋ ورىندارىندا بەتپەردە كيىپ جۇرۋگە شاقىرادى.
ايتا كەتسەك، شىمكەنت قالاسى بويىنشا COVID-19 ينفەكتسياسىن جۇقتىرعاندار سانى بۇگىندە 3594-كە جەتسە، جازىلىپ شىققاندار سانى 717 ادامدى قۇرايدى. جالپى ەلىمىزدە قاۋىپتى ىندەتتى جۇقتىرعانداردىڭ سانى – 49 مىڭ 683.
شىمكەنت
