بەلگىلى جۋرناليست قانات اۋەسباي ماحامبەت وتەمىسوۆ اتىنداعى باتىس قازاقستان ۋنيۆەرسيتەتىنىڭ باسقارما مۇشەسى – تاربيە جۇمىسى جانە الەۋمەتتىك ماسەلەلەر جونىندەگى پرورەكتورى قىزمەتىنە تاعايىندالدى. بۇل تۋرالى 7 قىركۇيەكتە جوو-نىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«بقۋ-داعى جاڭا قىزمەتىندە قانات اۋەسباي ۋنيۆەرسيتەتتىڭ تاربيە جانە الەۋمەتتىك ساياساتىن جەتىلدىرۋگە، ستۋدەنت جاستاردىڭ باستامالارىن قولداۋعا جانە جاستارمەن ءتيىمدى كوممۋنيكاتسيانى دامىتۋعا باسىمدىق بەرمەك»،–دەلىنگەن حابارلامادا.
قانات اۋەسباي 1982 جىلدىڭ 14 قاڭتارىندا تاراز قالاسىندا تۋعان. 2004 جىلى ءال-فارابي اتىنداعى قازاق ۇلتتىق ۋنيۆەرسيتەتىن «حالىقارالىق جۋرناليستيكا» ماماندىعى بويىنشا ۇزدىك ديپلوممەن تامامداعان. 2010 جىلى «قازاق تەلەارنالارىنداعى قازىرگى اقپاراتتىق باعدارلامالار تابيعاتى» تاقىرىبىندا كانديداتتىق ديسسەرتاتسيا قورعاعان.
2013–2014 جىلدارى «بولاشاق» حالىقارالىق ستيپەندياسى اياسىندا ۇلىبريتانياداعى University of East Anglia ۋنيۆەرسيتەتىندە عىلىمي-پەداگوگيكالىق تاعىلىمدامادان ءوتتى. سونىمەن قاتار ەكونوميكا جانە بيزنەس، قۇقىق باعىتتارى بويىنشا جوعارى ءبىلىم العان.
ول ەڭبەك جولىندا ءال-فارابي اتىنداعى قازۇۋ، ل.ن. گۋميلەۆ اتىنداعى ەۇۋ، ح. دوسمۇحامەدۇلى اتىنداعى اتىراۋ ۋنيۆەرسيتەتىندە وقىتۋشى، اعا وقىتۋشى جانە دوتسەنت قىزمەتتەرىن اتقارعان. سونداي-اق س. وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە جاستار ءىسى جانە الەۋمەتتىك ماسەلەلەر جونىندەگى پرورەكتور، ءال-فارابي اتىنداعى قازۇۋ جۋرناليستيكا فاكۋلتەتىنىڭ دەكانى بولعان.
جاڭا پرورەكتوردىڭ كاسىبي تاجىريبەسىندە مەديا سالاسىنىڭ دا ورنى ەرەكشە. ول «31 ارنا»، «قازاقستان»، «Astana» تەلەارنالارىندا قىزمەت اتقارىپ، «قازاقستان» رەسپۋبليكالىق تەلەراديوكورپوراتسياسى» اق اتىراۋ وبلىستىق فيليالىنىڭ ديرەكتورى، «Elorda Aqparat» مەديا-حولدينگىنىڭ ديرەكتور ورىنباسارى، «قازاقستان» تەلەراديوكورپوراتسياسىنىڭ ديدجيتال ديرەكتورى سياقتى لاۋازىمداردا ەڭبەك ەتكەن.
قانات اۋەسباي – عىلىمي ماقالالاردىڭ اۆتورى، بىرقاتار عىلىمي جانە قوعامدىق كەڭەستەردىڭ مۇشەسى. ەڭبەگى اقپارات جانە كوممۋنيكاتسيالار مينيسترلىگىنىڭ «اقپارات سالاسىنىڭ ۇزدىگى», قر مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى», قر عىلىم جانە جوعارى ءبىلىم مينيسترلىگىنىڭ «عىلىمدى دامىتۋعا قوسقان ۇلەسى ءۇشىن» توسبەلگىلەرىمەن جانە باسقا دا ماراپاتتارمەن اتاپ وتىلگەن.
