ارمان قىرىقباەۆ مادەنيەت جانە اقپارات ءمينيسترى بولىپ تاعايىندالدى. بۇل تۋرالى بۇگىن، 3 قىركۇيەكتە اقوردا جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن ارمان ورازبايۇلى قىرىقباەۆ قازاقستان رەسپۋبليكاسىنىڭ مادەنيەت جانە اقپارات ءمينيسترى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»،– دەلىنگەن حابارلامادا.
ارمان قىرىقباەۆ 1976 جىلى استانا قالاسىندا دۇنيەگە كەلگەن. 1996 جىلى قازاق مەملەكەتتىك باسقارۋ اكادەمياسىن «ەكونوميست» ماماندىعى بويىنشا تامامداعان. ودان كەيىن قازاقستان رەسپۋبليكاسى سىرتقى ىستەر مينيسترلىگىنىڭ ديپلوماتيالىق اكادەمياسىنا وقۋعا ءتۇسىپ، «حالىقارالىق قاتىناستار» ماماندىعى بويىنشا وقىعان.
ەڭبەك جولىن، ءسىم-دە تاۋەلسىز مەملەكەتتەر دوستاستىعى جانە بالتىق جاعالاۋى ەلدەرى باسقارماسىنىڭ رەفەرەنتى رەتىندە باستاعان. 1997-2002 جىلدار ارىلىعىندا سىرتقى ىستەر مينيسترلىگىندە ءارتۇرلى قىزمەتتەر اتقارعان. ال 2002-2005 جىلدارى «اۆە كورپوراتسياسىندا»، «ويلترانس ليميتەد» كومپانيالارىندا قىزمەت اتقارعان. 2005 جىلى الماتى قالاسىنداعى مەدەۋ اۋدانى اكىمىنىڭ ورىنباسارى بولىپ تاعايىندالعان. بۇل قىزمەتتە ءجۇرىپ، قالانىڭ جاستار ساياساتىن دامىتۋ مەملەكەتتىك قورىنىڭ ديرەكتورى قىزمەتىن قاتار اتقارعان.
سونىمەن قاتار ءار جىلدارى قاراعاندى وبلىسى اكىمىنىڭ، الماتى قالاسى اكىمىنىڭ ورىنباسارى قىزمەتتەرىن دە اتقارعان. الماتى قالاسىنا باۋىرجان بايبەك باسشىلىق ەتكەن كەزدە جانە ەربولات دوساەۆ كەلگەن تۇستا اكىم ورىنباسارى لاۋازىمىندا قىزمەت ەتكەن. 2024 جىلى الماتى اكىمدىگىنەن پرەزيدەنت اكىمشىلىگىنە اۋىسقان. بۇعان دەيىن ول پرەزيدەنتتىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى بولعان ەدى.
