Belgılı jurnalist Qanat Äuesbai Mahambet Ötemısov atyndaǧy Batys Qazaqstan universitetınıŋ Basqarma müşesı – tärbie jūmysy jäne äleumettık mäseleler jönındegı prorektory qyzmetıne taǧaiyndaldy. Būl turaly 7 qyrküiekte JOO-nyŋ baspasöz qyzmetı jazdy, dep habarlaidy «Adyrna» tılşısı.
«BQU-daǧy jaŋa qyzmetınde Qanat Äuesbai universitettıŋ tärbie jäne äleumettık saiasatyn jetıldıruge, student jastardyŋ bastamalaryn qoldauǧa jäne jastarmen tiımdı kommunikasiiany damytuǧa basymdyq bermek»,–delıngen habarlamada.
Qanat Äuesbai 1982 jyldyŋ 14 qaŋtarynda Taraz qalasynda tuǧan. 2004 jyly äl-Farabi atyndaǧy Qazaq ūlttyq universitetın «Halyqaralyq jurnalistika» mamandyǧy boiynşa üzdık diplommen tämamdaǧan. 2010 jyly «Qazaq telearnalaryndaǧy qazırgı aqparattyq baǧdarlamalar tabiǧaty» taqyrybynda kandidattyq dissertasiia qorǧaǧan.
2013–2014 jyldary «Bolaşaq» halyqaralyq stipendiiasy aiasynda Ūlybritaniiadaǧy University of East Anglia universitetınde ǧylymi-pedagogikalyq taǧylymdamadan öttı. Sonymen qatar ekonomika jäne biznes, qūqyq baǧyttary boiynşa joǧary bılım alǧan.
Ol eŋbek jolynda äl-Farabi atyndaǧy QazŪU, L.N. Gumilev atyndaǧy EŪU, H. Dosmūhamedūly atyndaǧy Atyrau universitetınde oqytuşy, aǧa oqytuşy jäne dosent qyzmetterın atqarǧan. Sondai-aq S. Ötebaev atyndaǧy Atyrau mūnai jäne gaz universitetınde jastar ısı jäne äleumettık mäseleler jönındegı prorektor, äl-Farabi atyndaǧy QazŪU Jurnalistika fakultetınıŋ dekany bolǧan.
Jaŋa prorektordyŋ käsıbi täjıribesınde media salasynyŋ da orny erekşe. Ol «31 arna», «Qazaqstan», «Astana» telearnalarynda qyzmet atqaryp, «Qazaqstan» respublikalyq teleradiokorporasiiasy» AQ Atyrau oblystyq filialynyŋ direktory, «Elorda Aqparat» media-holdingınıŋ direktor orynbasary, «Qazaqstan» teleradiokorporasiiasynyŋ didjital direktory siiaqty lauazymdarda eŋbek etken.
Qanat Äuesbai – ǧylymi maqalalardyŋ avtory, bırqatar ǧylymi jäne qoǧamdyq keŋesterdıŋ müşesı. Eŋbegı Aqparat jäne kommunikasiialar ministrlıgınıŋ «Aqparat salasynyŋ üzdıgı», QR Mädeniet jäne sport ministrlıgınıŋ «Mädeniet salasynyŋ üzdıgı», QR Ǧylym jäne joǧary bılım ministrlıgınıŋ «Ǧylymdy damytuǧa qosqan ülesı üşın» tösbelgılerımen jäne basqa da marapattarmen atap ötılgen.
