قىتايدىڭ مەديتسينالىق ونىمدەر جونىندەگى ۇلتتىق باسقارماسى (NMPA) جاساندى ينتەللەكت تەحنولوگيالارىنىڭ كومەگىمەن ازىرلەنگەن جاڭا پرەپاراتتى العاش رەت ماقۇلدادى. Mprosevir دەپ اتالاتىن ءدارى ەرەسەكتەردەگى جەڭىل جانە ورتاشا دەڭگەيدەگى COVID-19-دى ەمدەۋگە ارنالعان. بۇل تۋرالى Global Times باسىلىمى جازدى، دەپ حابارلايدى "ادىرنا".
پرەپاراتتى ازىرلەۋگە شامامەن 3,5 جىل جۇمسالعان. وسى ۋاقىت ارالىعىندا زەرتتەۋشىلەر پەرسپەكتيۆالى مولەكۋلانى انىقتاپ، ونى جەتىلدىرىپ، كلينيكاعا دەيىنگى جانە كلينيكالىق سىناقتاردىڭ بارلىق كەزەڭىنەن وتكىزگەن. مامانداردىڭ ايتۋىنشا، ءداستۇرلى ادىسپەن جاڭا ءدارى جاساۋعا ورتا ەسەپپەن 10–15 جىل قاجەت بولۋى مۇمكىن.
Mprosevir-ءدى ازىرلەۋ بارىسىندا عالىمدار جاساندى ينتەللەكتىنى پايدالانىپ، شامامەن 49 ميلليارد مولەكۋلالىق قوسىلىستى قامتيتىن دەرەكتەر قورىن تالداعان. جۇيە بىرنەشە كۇن ىشىندە ىقتيمالدىعى جوعارى مولەكۋلالاردى ىرىكتەۋگە مۇمكىندىك بەرگەن.
ودان كەيىن ماماندار ەكى جىل بويى تاڭدالعان مولەكۋلانىڭ قاسيەتتەرىن جەتىلدىرىپ، تيىمدىلىگىن ارتتىرۋعا جانە ۋىتتىلىعىن تومەندەتۋگە جۇمىس ىستەگەن. زەرتتەۋ الدىمەن جاسۋشالارعا جۇرگىزىلگەن سىناقتار مەن جانۋارلارعا جاسالعان تاجىريبەلەردەن ءوتىپ، كەيىن ادامداردىڭ قاتىسۋىمەن جۇرگىزىلگەن كلينيكالىق زەرتتەۋلەرگە دەيىن جالعاسقان.
ازىرلەۋشىلەردىڭ مالىمەتىنشە، جوبانىڭ بارلىق كەزەڭىندە جاساندى ينتەللەكت ماڭىزدى ءرول اتقارعان. ولاردىڭ پىكىرىنشە، Mprosevir-ءدىڭ جاسالۋى AI تەحنولوگيالارىن فارماتسەۆتيكا سالاسىندا قولدانۋدىڭ پراكتيكالىق تيىمدىلىگىن كورسەتەدى.
قىتايداعى ءدارى-دارمەكتەردى جىكتەۋ جۇيەسىندە 1-ساناتقا ەل ىشىندە دە، شەتەلدە دە بۇرىن نارىققا شىعارىلماعان، جاڭا ءارى يننوۆاتسيالىق پرەپاراتتار جاتادى. Mprosevir وسى ساناتقا ەنگىزىلگەن.
