قۇراما شتاتتار پرەزيدەنتى دونالد ترامپ دۇنيەجۇزىلىك دەنساۋلىق ساقتاۋ ۇيىمى (ددۇ) كوروناۆيرۋس پاندەمياسىمەن كۇرەستە دارمەنسىز بولۋىنا بايلانىستى ۇيىمنىڭ بيۋدجەتىنە جارنا تولەۋدى توقتاتا تۇرۋعا بۇيرىق بەرگەنىن مالىمدەدى. بۇل تۋرالى قازاقپارات ۆۆس اگەنتتىگىنە سىلتەمە جاساپ حابارلايدى.
«شىنايى جاعداي بىلاي، دۇنيەجۇزىلىك دەنساۋلىق ساقتاۋ ۇيىمى اقپاراتتى جەتكىلىكتى دارەجەدە الىپ وتىرمادى، تەكسەرمەدى جانە ونى ۋاقىتىلى جانە اشىق تۇردە جاريالامادى. الەم ەلدەرى دۇنيەجۇزىلىك دەنساۋلىق ساقتاۋ ۇيىمى دەنساۋلىققا تونەتىن حالىقارالىق قاۋىپ تۋرالى ناقتى اقپاراتتاردى ۋاقىتىلى تاراتىپ وتىراتىنىنا ۇمىتتەنەدى. ال ەگەر ولاي بولماسا ورىن الىپ جاتقان جاعداي تۋرالى ءوز بەتىمەن جەتكىزەدى. ددۇ اتالعان نەگىزگى مىندەتىن ورىندامادى جانە جاۋاپكەرشىلىككە تارتىلۋى كەرەك. ونداعان جىلداردان كەيىن ۋاقىت جەتتى»، - دەدى ترامپ اق ۇيدەگى ءباسپاسوز ءماسليحاتىندا.
پرەزيدەنتتىڭ ايتۋىنشا، بۇۇ اگەنتتىگى قىتايلىق جالعان اقپاراتتى تاراتقان. بۇل، ەپيدەميانىڭ اناعۇرلىم اۋقىمدى سالدارىنا الىپ كەلگەن. وسىلايشا، د. ترامپ قىتايدا پايدا بولعان ۆيرۋستىڭ عالامشار بويىنشا تارالىپ كەتۋ وقيعاسىندا ددۇ-نىڭ ءرولى انىقتالعانعا دەيىن قارجىلاندىرۋدى توقتاتا تۇرۋعا نۇسقاۋ بەردى.
ايتا كەتەيىك، اقش – ددۇ-نىڭ ەڭ ءىرى قارجىلاندىرۋ كوزى. تەك وتكەن جىلدىڭ وزىندە عانا ولاردىڭ جارناسى 400 ملن دوللاردى، ياعني ۇيىم بيۋدجەتىنىڭ 15% قۇراعان بولاتىن. ال بۇۇ باس حاتشىسى انتونيو گۋتەررەش قازىر دۇنيەجۇزىلىك دەنساۋلىق ساقتاۋ ۇيىمىنىڭ نەمەسە ۆيرۋسپەن كۇرەسەتىن باسقا دا گۋمانيتارلىق ۇيىمداردىڭ قىزمەتى ءۇشىن رەسۋرستاردى قىسقارتاتىن ۋاقىت ەمەس ەكەنىن مالىمدەدى.
«قازىر – بۇل ۆيرۋستى جانە ونىڭ ەپيدەميالىق سالدارىن جويۋ ءۇشىن حالىقارالىق قاۋىمداستىقتىڭ بىرلەسىپ جۇمىس جاساۋ ۋاقىتى»، - دەدى بۇۇ باس حاتشىسى.
