Қытайдың Медициналық өнімдер жөніндегі ұлттық басқармасы (NMPA) жасанды интеллект технологияларының көмегімен әзірленген жаңа препаратты алғаш рет мақұлдады. Mprosevir деп аталатын дәрі ересектердегі жеңіл және орташа деңгейдегі COVID-19-ды емдеуге арналған. Бұл туралы Global Times басылымы жазды, деп хабарлайды "Адырна".
Препаратты әзірлеуге шамамен 3,5 жыл жұмсалған. Осы уақыт аралығында зерттеушілер перспективалы молекуланы анықтап, оны жетілдіріп, клиникаға дейінгі және клиникалық сынақтардың барлық кезеңінен өткізген. Мамандардың айтуынша, дәстүрлі әдіспен жаңа дәрі жасауға орта есеппен 10–15 жыл қажет болуы мүмкін.
Mprosevir-ді әзірлеу барысында ғалымдар жасанды интеллектіні пайдаланып, шамамен 49 миллиард молекулалық қосылысты қамтитын деректер қорын талдаған. Жүйе бірнеше күн ішінде ықтималдығы жоғары молекулаларды іріктеуге мүмкіндік берген.
Одан кейін мамандар екі жыл бойы таңдалған молекуланың қасиеттерін жетілдіріп, тиімділігін арттыруға және уыттылығын төмендетуге жұмыс істеген. Зерттеу алдымен жасушаларға жүргізілген сынақтар мен жануарларға жасалған тәжірибелерден өтіп, кейін адамдардың қатысуымен жүргізілген клиникалық зерттеулерге дейін жалғасқан.
Әзірлеушілердің мәліметінше, жобаның барлық кезеңінде жасанды интеллект маңызды рөл атқарған. Олардың пікірінше, Mprosevir-дің жасалуы AI технологияларын фармацевтика саласында қолданудың практикалық тиімділігін көрсетеді.
Қытайдағы дәрі-дәрмектерді жіктеу жүйесінде 1-санатқа ел ішінде де, шетелде де бұрын нарыққа шығарылмаған, жаңа әрі инновациялық препараттар жатады. Mprosevir осы санатқа енгізілген.
