Memleket basşysy Qasym-Jomart Toqaev «Qazaqstan Respublikasy vise-prezidentınıŋ ökılettıkterı turaly» jarlyqqa qol qoidy, dep habarlaidy “Adyrna” tılşısı.
Qūjatqa säikes, Qazaqstan Respublikasynyŋ vise-prezidentı memlekettıŋ ışkı jäne syrtqy saiasaty salasyndaǧy strategiialyq sipattaǧy bastamalardy äzırleudı qamtamasyz etıp, olardy Prezidentke ūsynady.
Sondai-aq Prezidenttıŋ tapsyrmasy boiynşa Qūryltaimen, Ükımetpen, memlekettık organdarmen, saiasi partiialarmen, qoǧamdyq bırlestıktermen jäne halyqaralyq ūiymdarmen özara ıs-qimyl kezınde Prezident atynan ökıldık etedı. Halyqaralyq ıs-şaralarǧa qatysady.
Vise-prezident Älemdık jäne dästürlı dınder liderlerı sezınıŋ hatşylyǧyn basqarady. Sonymen qatar Prezident janyndaǧy Qazaqstannyŋ strategiialyq zertteuler institutynyŋ qyzmetıne jetekşılık etedı.
Būdan bölek, vise-prezident Memlekettık nagradalar jönındegı komissiia, Azamattyq mäselelerı jönındegı komissiia, Jastar saiasaty jönındegı keŋes jäne memlekettık syilyqtardy beru jönındegı komissiialardy qosa alǧanda, bırqatar komissiialar men keŋesterdıŋ qyzmetın qamtamasyz etedı.
Jarlyqta vise-prezidenttıŋ öz qūzyretı şegınde ökım şyǧaruǧa, ortalyq jäne jergılıktı atqaruşy organdarǧa tapsyrma beruge, memlekettık organdardan qajettı aqparat pen qūjattardy sūratuǧa jäne vedomstvoaralyq jūmys toptaryn qūruǧa qūqyly ekenı körsetılgen.
Vise-prezidenttıŋ qyzmetın ūiymdyq-qūqyqtyq, aqparattyq-taldamalyq jäne özge de baǧyttar boiynşa Qazaqstan Respublikasy Prezidentınıŋ Äkımşılıgı qamtamasyz etedı.
Qūjatqa säikes, Ükımetke, Prezident Äkımşılıgıne jäne Prezident Is basqarmasyna jarlyqtan tuyndaityn tiıstı şaralardy qabyldau tapsyryldy.
Jarlyq qol qoiylǧan künınen bastap qoldanysqa engızıldı.
Eske salaiyq, 31 tamyzda Prezident Qasym-Jomart Toqaev Erlan Karindı Prezident Äkımşılıgı Basşysynyŋ orynbasary qyzmetınen bosatqan. Keiın Qazaqstan Respublikasynyŋ vise-prezidentı etıp taǧaiyndaǧan edı.
