الماتىداعى بۋتاكوۆ شاتقالىندا شامامەن 2,8 مىڭ جىلدىق «بۇتاقتى-2» ارحەولوگيالىق ەسكەرتكىشىنىڭ ءبىر بولىگىن قۇرىلىس تەحنيكاسى جايپاپ تاستاعانى تۋرالى اقپارات تارادى، دەپ حابارلايدى “ادىرنا” ءتىلشىسى.
بۇل تۋرالى قازاقستاندىق ارحەولوگتاردىڭ «قازاقستان – پەتروگليفتەر ەلى» قاۋىمداستىعى حابارلاعان.
ارحەولوگتاردىڭ ايتۋىنشا، ەرتە تەمىر داۋىرىنە جاتاتىن كونە قونىستا 15 تۇرعىن جاي بولعان. سونىڭ توعىزى قۇرىلىس جۇمىستارى كەزىندە جويىلىپ، مادەني قاباتتىڭ ەداۋىر بولىگى بۇلىنگەن.
مامانداردىڭ مالىمەتىنشە، ەسكەرتكىش اۋماعىندا قۇرىلىس جۇمىستارى ارحەولوگتاردىڭ رۇقساتىنسىز جۇرگىزىلگەن. الماتى ارحەولوگتارى نىساندى جويۋعا رۇقسات الۋ جونىندە وزدەرىنە ەشكىم جۇگىنبەگەنىن ايتقان.
مارعۇلان اتىنداعى ارحەولوگيا ينستيتۋتىنىڭ جەتەكشى عىلىمي قىزمەتكەرى الەكساندر گورياچەۆتىڭ سوزىنشە، قۇرىلىس تەحنيكاسى 3-4 مەتر تەرەڭدىكتەگى تومەنگى قاباتتى تولىق بۇزعان.
«بۇتاقتى-2» ەسكەرتكىشى ءۇش قاباتتان تۇرادى. مامانداردىڭ ايتۋىنشا، ەكىنشى جانە ءۇشىنشى، ياعني ورتاڭعى جانە جوعارعى قاباتتارى ازىرگە ساقتالعان. الايدا تومەنگى بولىكتە ەجەلگى توعىز تۇرعىن جاي مەن شارۋاشىلىق قۇرىلىستارى بولعان.
زەرتتەۋشىلەر بۇل اۋماقتان تاس قۇرالدار مەن قىش بۇيىمداردىڭ قالدىقتارى تابىلعانىن اتاپ ءوتتى. ولاردىڭ پىكىرىنشە، ەسكەرتكىشتىڭ نەگىزگى قۇندىلىعى تەك ارحەولوگيالىق جادىگەرلەردە ەمەس، ەجەلگى تۇرعىن ۇيلەردىڭ قۇرىلىمى مەن قۇرىلىس تەحنولوگيالارىندا جاتىر.
مامانداردىڭ ايتۋىنشا، مۇنداي دەرەكتەر ەجەلگى ادامداردىڭ تۇرمىسىن، قولونەرىن جانە تابيعي رەسۋرستاردى پايدالانۋ تاسىلدەرىن زەرتتەۋگە مۇمكىندىك بەرەر ەدى.
