اقتاۋدان اسكەرگە شاقىرىلىپ، اقتوبەدەگى ۇلتتىق ۇلاننىڭ №6655 اسكەري بولىمىندە مەرزىمدى اسكەري قىزمەتىن وتەپ جۇرگەن 18 جاستاعى سارباز اۋرۋحاناعا ءتۇستى، دەپ حابارلايدى "ادىرنا" ءتىلشىسى.
ول اسكەري بولىمدە سەرجانتتار بىرنەشە رەت ۇرعانىن ايتىپ، ۆيدەوۇندەۋ جاريالاعان.
بۇل تۋرالى Lada.kz جازدى.
ساربازدىڭ اناسى گۇلدانا كەتىباەۆانىڭ ايتۋىنشا، ونىڭ ۇلى دوسىمبەت 3 شىلدەدە اسكەرگە شاقىرىلعان. 4 قىركۇيەكتە اناسىنا اقتوبەدەگى اۋرۋحانادان قوڭىراۋ ءتۇسىپ، ۇلىنىڭ ءۇش كۇننەن بەرى ەم الىپ جاتقانى ايتىلعان.
العاشىندا ساربازدى ۋرولوگ تەكسەرگەن. الايدا تالداۋلاردان ينفەكتسيا انىقتالماعان. كەيىن تراۆماتولوگ شاقىرىلىپ، دارىگەر قۋىقتاعى ماسەلەگە العان جاراقاتى سەبەپ بولۋى مۇمكىن ەكەنىن ايتقان.
وسىدان كەيىن سارباز اناسىنا اسكەري بولىمدە ءوزىن بىرنەشە رەت ۇرعانىن جەتكىزگەن. ونىمەن سويلەسكەن تراۆماتولوگ پوليتسيا شاقىرىپ، سارباز ارىز جازعان.
پوليتسيا بولىمىندە وتىرعان كەزىندە دوسىمبەت اناسىمەن ۆيدەوبايلانىسقا شىعىپ، ءوزىن اعا سەرجانت پەن تاعى ەكى سەرجانت ۇرعانىن ايتقان.
ساربازدىڭ اناسى تۋىستارىمەن بىرگە اقتاۋدان اقتوبەگە جولعا شىعۋعا دايىندالىپ جاتقانىن ايتتى. ول اسكەري بولىمدەگى جاعدايدى تەكسەرىپ، ءىستىڭ اشىق تەرگەلۋىن سۇرادى.
اسكەري ءبولىم وكىلدەرى جۋرناليستەرگە دوسىمبەت ەركەبۇلاننىڭ وسى بولىمدە قىزمەت ەتەتىنىن جانە قازىرگى ۋاقىتتا اۋرۋحانادا جاتقانىن راستاعان.
