تۇركيادا ەم قابىلداعان سارباز ەربايان مۇحتار ەلگە ورالدى. بۇل تۋرالى زاڭگەر ينگا يمانباي ءوز Facebook پاراقشاسىندا جازدى، دەپ حابارلايدى "ادىرنا".
زاڭگەردىڭ ايتۋىنشا، ەرباياننىڭ قازىرگى جاعدايى تۇراقتى. دارىگەرلەر تولىق وڭالۋعا ۋاقىت قاجەت ەكەنىن اتاپ وتكەن.
«دارىگەرلەر ەم تولىق اسەر ەتۋى ءۇشىن كەمىندە ءۇش اي ۋاقىت كەرەك ەكەنىن ايتتى. سول سەبەپتى ءۇش ايدان كەيىن ەربايان قايتادان ىستامبۇلعا بارىپ، ەمنىڭ رەابيليتاتسيالىق كەزەڭىن جالعاستىرادى»، – دەپ جازدى يمانباي.
ونىڭ شەتەلدە ەم الۋىنا دەنساۋلىق ساقتاۋ ءمينيسترى اقمارال ءالنازاروۆا جانە ۇشۋ ماسەلەسىن ۇيىمداستىرۋعا كومەكتەسكەن گەنەرال قايرات ۇمبەتوۆ قولداۋ كورسەتكەن.
ينگا يمانباي بۇل ناتيجەنى ەرباياننىڭ وتباسى مەن قوعامنىڭ جاناشىرلىعىنىڭ، سونداي-اق جاۋاپتى ورگانداردىڭ بىرلەسكەن ەڭبەگىنىڭ ارقاسى دەپ اتاپ ءوتتى:
«ەكى رەت شەتەلدە ەم الۋ – ۇلكەن ەڭبەك پەن جاناشىرلىقتىڭ ناتيجەسى. جاراقاتىنىڭ اۋىرلىعىنا بايلانىستى ايتارلىقتاي وزگەرىس بىردەن بايقالمايدى. بۇل – دارىگەرلەر كۇتەتىن دە، ءبىز تۇسىنەتىن دە پروتسەسس. سوعان قاراماستان، ەربايان وزىنە لايىقتى ءومىر ءسۇرۋ ءۇشىن كۇرەسىپ جاتىر. وعان سىزدەردىڭ قولداۋلارىڭىز ەرەكشە كۇش بەرىپ كەلەدى»، – دەيدى ول.
ەسكە سالايىق، ەربايان مۇحتار اسكەري قىزمەت كەزىندە باس-مي جاراقاتىن الىپ، كوماعا تۇسكەن بولاتىن. دەنساۋلىق ساقتاۋ مينيسترلىگى وعان ازاماتتىق ەمحانادا ەمدەلۋگە رۇقسات بەرگەنىمەن، ءبىراز ۋاقىتتان سوڭ ساربازدى ۇيگە شىعارىپ جىبەرگەن. وسىدان كەيىن ونىڭ وتباسى قوعامنان كومەك سۇراپ، ەم-دومعا قاجەتتى قاراجات جيناۋ ءۇشىن شوت اشقان.
قوعامنىڭ قولداۋى ناتيجەسىندە 140 ميلليون تەڭگە جينالىپ، ەربايانعا ىستامبۇلدا كۇردەلى وتا جاسالدى. قازىر ول ەلگە ورالىپ، ەمنىڭ العاشقى كەزەڭىن ءساتتى اياقتاپ وتىر. الداعى ايلاردا وڭالتۋ تەراپياسىن جالعاستىرۋ ءۇشىن تۇركياعا قايتا ورالۋى جوسپارلانۋدا.
