قازاقستان پرەزيدەنتى قاسىم-جومارت توقاەۆ يتاليا پرەمەر-ءمينيسترى دجوردجا مەلونيدى ونىڭ ۇكىمەتىنىڭ ەل تاريحىنداعى ەڭ ۇزاق ۋاقىت قىزمەت اتقارعان ۇكىمەتكە اينالۋىنا بايلانىستى قۇتتىقتادى. مەملەكەت باسشىسى بۇل تۋرالى ءوزىنىڭ ح الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا".
توقاەۆ دجوردجا مەلونيدىڭ كوشباسشىلىعىنا جوعارى باعا بەرىپ، ونىڭ ۇلتتىق مۇددەنى قورعاۋعا دەگەن ۇستانىمى يتاليانىڭ ەكونوميكالىق ءوسىمىن ساقتاۋعا جانە حالىقارالىق ارەناداعى بەدەلىن نىعايتۋعا ىقپال ەتكەنىن اتاپ ءوتتى.
«مەن ونىڭ قازاقستان مەن يتاليا اراسىنداعى دوستىق ءارى ستراتەگيالىق سەرىكتەستىكتى نىعايتۋعا قوسقان ۇلەسىن جوعارى باعالايمىن»، – دەپ جازدى پرەزيدەنت.
سونداي-اق قاسىم-جومارت توقاەۆ يتاليا پرەمەر-مينيسترىنە جاۋاپتى قىزمەتىندە تابىس تىلەپ، ەلدىڭ ودان ءارى دامۋى مەن وركەندەۋىنە باعىتتالعان جۇمىسىنا ساتتىلىك تىلەدى.
ايتا كەتەيىك، دجوردجا مەلوني 2025 جىلعى مامىردا قاسىم-جومارت توقاەۆتىڭ شاقىرۋىمەن قازاقستانعا رەسمي ساپارمەن كەلگەن بولاتىن. ساپار بارىسىندا يتاليا ۇكىمەتىنىڭ باسشىسىن مەملەكەت باسشىسى استانا اۋەجايىندا قارسى الدى.
كەيىن اقوردادا قازاقستان پرەزيدەنتى مەن يتاليا پرەمەر-ءمينيسترىنىڭ كەلىسسوزدەرى ءوتتى. تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى دامىتۋ ماسەلەلەرىن تالقىلادى.
دجوردجا مەلوني 2022 جىلعى 22 قازاننان بەرى يتاليا ۇكىمەتىن باسقارىپ كەلەدى. ول ەل تاريحىنداعى مينيسترلەر كەڭەسىنىڭ توراعاسى قىزمەتىنە كەلگەن العاشقى ايەل سانالادى. مەلوني بۇعان دەيىن سيلۆيو بەرلۋسكونيدىڭ ءتورتىنشى ۇكىمەتىندە جاستار ءىسى جونىندەگى مينيستر قىزمەتىن اتقارعان.
ول 2014 جىلدان بەرى «يتاليا باۋىرلارى» پارتياسىن باسقارادى. 2020 جىلدان باستاپ ەۋروپالىق كونسەرۆاتورلار مەن رەفورماتورلار پارتياسىنىڭ جەتەكشىسى.
