VI دۇنيەجۇزىلىك كوشپەندىلەر ويىندارىنىڭ ارالىق ناتيجەسى بويىنشا قازاقستان قۇراماسى جالپىكوماندالىق ەسەپتە ءبىرىنشى ورىندا تۇر. بۇل تۋرالى تۋريزم جانە سپورت مينيسترلىگى جازدى، دەپ حابارلايدى “ادىرنا”.
4 قىركۇيەكتەگى مالىمەتكە سايكەس، قازاقستاندىق سپورتشىلاردىڭ ەنشىسىندە 55 مەدال بار. ونىڭ 25-ءى – التىن، 13-ءى – كۇمىس، 17-ءسى – قولا.
جالپىكوماندالىق ەسەپتە ەكىنشى ورىندا قىرعىزستان قۇراماسى ورنالاسقان. قىرعىزستان سپورتشىلارى 23 التىن، 24 كۇمىس جانە 11 قولا مەدال يەلەنىپ، جالپى 58 جۇلدە جيناعان. ۇزدىك ۇشتىكتى رەسەي قۇراماسى تۇيىندەپ تۇر. رەسەي سپورتشىلارىنىڭ قورجىنىندا 4 التىن، 6 كۇمىس جانە 13 قولا مەدال بار.
قازاقستاندىقتار جارىس باعدارلاماسىنا ەنگەن 42 سپورتتىڭ 31 تۇرىندە باق سىناپ ۇلگەردى. وتانداستارىمىز اۋدارىسپاق، قازاق كۇرەسى، الىش، ارمرەستلينگ، سامبو، ارقان تارتۋ، ءداستۇرلى ساداق اتۋ، ات جارىستارى، قۇسبەگىلىك جانە وزگە دە سپورت تۇرلەرىنەن جۇلدەلى ورىندارعا يە بولدى.
دەگەنمەن، جارىستار ءالى اياقتالعان جوق. سوندىقتان الداعى باسەكەلەردىڭ قورىتىندىسىنا قاراي كوماندالاردىڭ جالپىكوماندالىق ەسەپتەگى پوزيتسياسى وزگەرۋى مۇمكىن. قازاقستان سپورتشىلارى ءالى 11 سپورت تۇرىنەن سىنعا تۇسەدى.
ايتا كەتەيىك، VI دۇنيەجۇزىلىك كوشپەندىلەر ويىندارىنا الەمنىڭ 113 ەلىنەن شامامەن 3 مىڭ سپورتشى قاتىسىپ جاتىر.
