دۋباي قالاسىندا وتكەن جاسوسپىرىمدەر اراسىنداعى V ازيا پارا ويىندارى ءوز مارەسىنە جەتتى. جارىس قورىتىندىسى بويىنشا قازاقستان قۇراماسى 68 مەدال جەڭىپ الدى. ونىڭ ىشىندە 25 التىن، 23 كۇمىس جانە 20 قولا جۇلدە بار. جالپى مەدالدىق ەسەپتە قازاقستاندىق كوماندا 45 مەملەكەتتىڭ ىشىندە 5-ءشى ورىنعا تۇراقتادى.
اتالعان جارىستا قازاقستان اتىنان 60 سپورتشى 9 سپورت ءتۇرى بويىنشا سىنعا ءتۇستى. جارىس بارىسىندا پارا جۇزۋدەن 34 مەدال، پارا قول كۇرەسىنەن 11 مەدال، پارا ۇستەل تەننيسىنەن 7 مەدال، پارا جەڭىل اتلەتيكادان 6 مەدال جانە پارا پاۋەرليفتينگتەن 6 مەدال جەڭىپ الىندى.
سونىمەن قاتار گولبولدان ۇلتتىق قۇراما التىن مەدالعا، بوچچادان كۇمىس مەدالعا، ال پارا تاەكۆوندودان ءبىر كۇمىس جانە ءبىر قولا مەدالعا قول جەتكىزدى. پارا ساداق اتۋدان قازاقستان اتىنان ءبىر سپورتشى قاتىسىپ، بۇل سپورت ءتۇرى بويىنشا جۇلدە تىركەلگەن جوق.
«جاسوسپىرىمدەر اراسىنداعى V ازيا پارا ويىندارىندا ەلىمىزدىڭ سپورتشىلارى جاقسى ناتيجە كورسەتتى. بۇل جەتىستىك – مەملەكەتتىك قولداۋدىڭ، باپكەرلەر مەن مەديتسينالىق پەرسونالدىڭ، سونداي-اق اتا-انالاردىڭ بىرلەسكەن ەڭبەگىنىڭ جەمىسى. سونىمەن قاتار، بۇل ويىندار جاس سپورتشىلار ءۇشىن حالىقارالىق ارەنادا تاجىريبە جيناۋعا، حالىقارالىق كلاسسيفيكاتسيادان وتۋگە جانە ءوز ناتيجەلەرىن ودان ءارى جاقسارتۋعا مۇمكىندىك بەرەتىن ماڭىزدى جارىس بولدى»، – دەدى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ سپورت باسقارماسىنىڭ باسشىسى قايرات سەيتبەكوۆ.
ايتا كەتەيىك، جاسوسپىرىمدەر اراسىنداعى V ازيا پارا ويىندارى 10–13 جەلتوقسان ارالىعىندا دۋباي قالاسىندا ء(باا) ءوتتى. جارىسقا 45 ەلدەن 1300-دەن استام سپورتشى قاتىسىپ، 11 سپورت ءتۇرى بويىنشا 481 مەدال جيىنتىعى ساراپقا سالىندى.
