6 қыркүйекте Өзбекстан астанасында елідегі алғашқы тұрақты Заманауи өнер орталығы — CCA Tashkent өз есігін айқара ашады. Жаңа кешен 1912 жылы салынған тарихи дизельдік электр станциясының ғимаратында орналасқан. Француздық Studio KO сәулет бюросы жаңғыртқан бұл нысан енді көрме залдары, зерттеу архиві, кітапхана және шеберлік сыныптары өтетін ашық қалалық кеңістікке айналды.
Орталықтың ресми ашылуы қарсаңында нысанға Өзбекстан Президенті Шавкат Мирзиёев арнайы барып, атқарылған жұмыстармен және алдағы жоспарлармен танысты. Бұл заманауи мәдениет пен шығармашылық бастамаларды мемлекеттік деңгейде жүйелі қолдаудың айқын белгісі болып отыр. Бұған дейін елдің халықаралық мәдени бренді көбінесе Самарқанд, Бұхара және Хиуаның көне ескерткіштерімен шектелсе, жаңа бастама Орталық Азияның қазіргі дәуірдегі интеллектуалдық әлеуетін танытуды мақсат етеді.
Орталықтың тұсаукесері халықаралық Сара Раза жетекшілік ететін «Hikmah» («Даналық») атты ірі көрмеден басталады. 2027 жылдың қаңтарына дейін созылатын экспозиция өңірдің рухани мұрасын, тарихи жадын және қазіргі философиялық көзқарастарын зерделейді. Көрмеде жергілікті және шетелдік суретшілердің еңбектерімен қатар, И. В. Савицкий атындағы мемлекеттік өнер музейі мен атақты Соломон Гуггенхайм музейі қорының бірегей туындылары көпшілік назарына ұсынылады.
CCA Tashkent жай ғана көрме алаңы емес, сонымен қатар XX және XXI ғасырлардағы Орталық Азия өнерін жинақтап, жүйелейтін маңызды ғылыми-зерттеу және академиялық хабқа айналмақ. Орталықтың іске қосылуы өңірлік мәдениеттің өзіндік дауысын жаһандық деңгейде айқындап, көршілес елдер арасындағы шығармашылық байланыстарды жаңа белеске көтереді.
