گەرمانيالىق ساياحاتشى لارا زيولدنەر قازاقستاننان وزبەكستانعا ءوتۋ كەزىندە كۇتپەگەن قيىندىققا تاپ بولدى. ول بەينەۋ كەنتىنەن پويىزبەن كەتپەك بولعانىمەن، ۆەلوسيپەدىنە قاتىستى تالاپتارعا بايلانىستى ۆاگونعا كىرگىزىلمەگەن، دەپ حابارلايدى “ادىرنا” ۇلتتىق پورتالى Tengrinews سايتىنا سىلتەپ.
ساياحاتشى بۇل جاعدايدى Instagram-دا جاريالاپ، ۆيدەو 5,3 ميلليوننان استام قارالىم جيناعان.
لارانىڭ ايتۋىنشا، قازاقستاننان وزبەكستانعا تىكەلەي وتۋگە مۇمكىندىك بولماعاندىقتان، ەلدەن پويىز ارقىلى شىعۋدى جوسپارلاعان. الايدا شەكاراداعى جاعدايعا بايلانىستى پويىز بيلەتتەرىنىڭ بارلىعى دەرلىك ساتىلىپ كەتكەن.
ول بوس ورىن پايدا بولادى دەگەن ۇمىتپەن بىرنەشە كۇن ۆوكزالدا كۇتۋگە ءماجبۇر بولعان. كەيىن شىمكەنتكە دەيىن بيلەت الىپ، سول جەردەن شەكارادان ءوتۋدىڭ جولىن قاراستىرماق بولعان.
«بەس كۇن بويى قولىمداعى بيلەتپەن كەتۋگە تىرىسىپ، شەكارا ارقىلى وتەتىن تولى پويىزداردىڭ بىرىنە مىنۋگە مۇمكىندىك كۇتىپ ءجۇردىم. بىراق جولىم بولمادى»، – دەيدى ساياحاتشى.
اقىرى جەكسەنبى كۇنى لارا بيلەت ساتىپ العان. ونىڭ سوزىنشە، بۇعان دەيىن ۆەلوسيپەدپەن بايلانىستى ماسەلە بولمايتىنى ايتىلعان. الايدا پويىزعا وتىرار ساتتە جاعداي وزگەرىپ كەتكەن.
ساياحاتشىنىڭ ايتۋىنشا، قىزمەتكەرلەر ونى ۆەلوسيپەدپەن ۆاگونعا كىرگىزبەگەن. ول بىرنەشە كۇن كۇتكەننەن كەيىن پويىزعا وتىرا الماعانىنا اشۋلانعانىن جانە بيلەت قۇنى تولىق قايتارىلماعانىن ايتتى.
لارا وقيعانى ۆيدەوعا ءتۇسىرىپ، Instagram پاراقشاسىندا جاريالاعان. جازبا قىسقا ۋاقىت ىشىندە كەڭ تاراپ، 5,3 ميلليوننان استام قارالىم جينادى.
جەلى قولدانۋشىلارىنىڭ پىكىرلەرى ءارتۇرلى بولدى. ءبىرى قازاقستانداعى پويىزداردا ۆەلوسيپەد تاسىمالداۋ ءتارتىبى تۋرالى الدىن الا ءبىلۋ كەرەك ەكەنىن ايتسا، ەندى ءبىرى ساياحاتشىعا پوليتسيادان كومەك سۇراۋعا كەڭەس بەرگەن.
ساياحاتشىنىڭ مالىمەتىنشە، ول ازىرگە بەينەۋدە قالىپ وتىر جانە ءارى قاراي ساپارىن قالاي جالعاستىراتىنىن شەشپەگەن.
لارا قيىن جاعدايدا وعان كومەكتەسۋگە تىرىسقان جەرگىلىكتى ايەلگە دە العىسىن ءبىلدىردى. ساياحاتشىنىڭ ايتۋىنشا، ول نەمىس، قازاق جانە ورىس تىلدەرىن ەركىن مەڭگەرگەن.
وقيعاعا قاتىستى «جولاۋشىلار تاسىمالى» كومپانياسى ءوز تۇسىنىكتەمەسىن بەردى. تاسىمالداۋشىنىڭ مالىمەتىنشە، ماسەلە ۆەلوسيپەدتىڭ بولۋىندا ەمەس، ونى بولشەكتەمەي جانە قاپتاماسىز پويىزعا الىپ كىرۋگە ارەكەت جاسالعانىندا.
كومپانيا قولدانىستاعى ەرەجەگە سايكەس، قوزعالتقىشى جوق ۆەلوسيپەد قول جۇگى رەتىندە تەك بولشەكتەلىپ، ارنايى قاپتاماعا سالىنعان جاعدايدا عانا جولاۋشىلار ۆاگونىندا تاسىمالداناتىنىن ءتۇسىندىردى. ال كولەمى ۇلكەن جانە قاپتالماعان ۆەلوسيپەدتەردى جولاۋشىلار ۆاگونىنا كىرگىزۋگە بولمايدى.
كومپانيا وكىلدەرىنىڭ ايتۋىنشا، جولسەرىكتەر لاراعا بالاما نۇسقا ۇسىنعان. پويىز قۇرامىندا تىركەمەلى جۇك ۆاگونى بولعاندىقتان، ۆەلوسيپەدتى باگاج رەتىندە سول ۆاگونمەن جىبەرۋگە مۇمكىندىك بولعان.
الايدا پويىزدىڭ جونەلۋىنە از ۋاقىت قالعان. سوندىقتان ساياحاتشىلار ۆەلوسيپەدتى باگاج رەتىندە راسىمدەپ ۇلگەرمەي، پويىزعا وتىرماي قالۋدى تاڭداعان.
تاسىمالداۋشى بيلەت اقشاسى تولىق كولەمدە ەمەس، بەلگىلەنگەن قايتارۋ تارتىبىنە سايكەس ءتيىستى ۇستالىمدار جاسالعاننان كەيىن قايتارىلاتىنىن حابارلادى.
