ەندى 15 جاستان اسقان جاسوسپىرىمدەر پويىزبەن ءجۇرۋ ءۇشىن اتا-اناسىنىڭ سەنىمحاتىن المايدى. بۇل تۋرالى كولىك پروكۋراتۋراسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
باس كولىك پروكۋراتۋراسى جوسپارلى تالداۋ ناتيجەسى بويىنشا ينۆەستيتسيالار جانە دامۋ ءمينيسترىنىڭ بۇيرىعىنا نارازىلىق ءبىلدىردى.
«تەمىرجول كولىگىمەن جولاۋشىلاردى، باگاجدى، جۇك باگاجدى جانە پوشتا جونەلتىلىمدەرىن تاسىمالداۋ قاعيدالارىن بەكىتۋ تۋرالى» بۇيرىققا سايكەس 15 جانە ودان اسقان بالالار «قتج»ۇك» اق-نىڭ قىزمەتتەرىن زاڭدى وكىلدەن نوتاريالدى كۋالاندىرىلعان جازباشا كەلىسىم مەن سەنىمحات بولعان جاعدايدا عانا دەربەس پايدالانا الاتىنى انىقتالدى.
بۇل نورما ازاماتتىق كودەكس پەن «نوتاريات تۋرالى» زاڭعا سايكەس «كەلىسىمدى» كۋالاندىرۋ جەكە نوتارياتتىق ءىس-ارەكەت بولىپ سانالاتىنىن جانە «سەنىمحات» تۇرىندە باسقا قۇجاتتى رەسىمدەۋدى تالاپ ەتپەيتىنىن ەسكەرمەگەن.
بۇل ەرەجەلەردى قولدانۋ مونيتورينگى كورسەتكەندەي، جولسەرىكتەر وسى قاعيدالارعا سىلتەمە جاساپ، بۇنداي جولاۋشىلار ساپارعا جىبەرىلمەي نەمەسە ولاردى قوزعالىس بارىسىندا الىنىپ تاستالىنعان جاعدايلار بولعان.
بۇگىنگى تاڭدا يندۋستريا جانە ينفراقۇرىلىمدىق دامۋ مينيسترلىگى پروكۋراتۋرانىڭ نارازىلىعىن تولىق كولەمدە قاناعاتتاندىردى جانە «قتج» ۇك»اق ءبىر عانا قۇجاتتىڭ (نوتاريالدى كۋالاندىرىلعان كەلىسىم) بولۋى بويىنشا وسىنداي قىزمەتتەر كورسەتۋ تۋرالى نۇسقاۋ بەردى، - دەپ اتاپ ءوتتى كولىك پروكۋراتۋراسىنىڭ ءباسپاسوز قىزمەتى.
ودان بولەك، ۋاكىلەتتى ورگان جولاۋشىلاردى تەمىر جول كولىگىمەن تاسىمالداۋ جونىندەگى قاعيدالارعا ءتيىستى تۇزەتۋلەر ەنگىزۋ جانە جالپى ونى جەتىلدىرۋ جۇمىستارىن جالعاستىرۋدا.
