قىتاي توراعاسى سي تسزينپين شانحاي ىنتىماقتاستىق ۇيىمى (شىۇ) وڭىرلىك جانە جاھاندىق ءتارتىپتى قالىپتاستىرۋعا بەلسەندىرەك قاتىسۋى كەرەك دەپ مالىمدەدى. بۇل تۋرالى ول 1 قىركۇيەكتە بىشكەكتە وتكەن شىۇ سامميتىندە ايتتى، دەپ حابارلايدى "ادىرنا".
قىتاي كوشباسشىسى ۇيىمدى دامۋ، قاۋىپسىزدىك، وركەنيەتتەر ديالوگى جانە جاھاندىق باسقارۋ سالالارىنداعى باستامالاردى جۇزەگە اسىراتىن ماڭىزدى الاڭعا اينالدىرۋدى ۇسىندى. ونىڭ ايتۋىنشا، 25 جىل ىشىندە شىۇ اۋماعى، حالقى جانە ەكونوميكالىق الەۋەتى بويىنشا الەمدەگى ەڭ ءىرى وڭىرلىك ۇيىمداردىڭ بىرىنە اينالدى.
سي تسزينپين شىۇ اياسىنداعى ەكونوميكالىق ىنتىماقتاستىقتى كەڭەيتۋدى ۇسىندى. اتاپ ايتقاندا، ساۋدا، ينۆەستيتسيا، كولىك، ەنەرگەتيكا، جاساندى ينتەللەكت، تسيفرلىق ەكونوميكا جانە جاسىل تەحنولوگيالار سالالارىنا باسىمدىق بەرىلمەك.
قىتاي الداعى ءۇش جىلدا شىۇ ەلدەرىمەن بىرلەسىپ 100 عىلىمي-تەحنيكالىق جوبانى جۇزەگە اسىرۋدى جوسپارلاپ وتىر. سونىمەن قاتار بەيجىڭ ترانسكاسپي حالىقارالىق كولىك باعىتىن دامىتۋعا قولداۋ ءبىلدىردى.
قاۋىپسىزدىك سالاسىندا سي تسزينپين تەرروريزم، ەكسترەميزم، ەسىرتكى تاسىمالى، ترانسۇلتتىق قىلمىس جانە كيبەرقاۋىپتەرگە قارسى بىرلەسكەن ءىس-قيمىلدى كۇشەيتۋگە شاقىردى.
سونداي-اق قىتاي شىۇ-نىڭ ۋكرايناداعى سوعىس، تاياۋ شىعىستاعى قاقتىعىستار جانە اۋعانستانداعى جاعداي بويىنشا ورتاق ۇستانىمدارىن ۇيلەستىرۋگە دايىن ەكەنىن مالىمدەدى.
سي ءتسزينپيننىڭ ۇسىنىستارى شىۇ-نى تەك وڭىرلىك ىنتىماقتاستىق ۇيىمى ەمەس، كوپپوليارلى الەمدىك ءتارتىپتى قالىپتاستىرۋعا ىقپال ەتەتىن حالىقارالىق پلاتفورما رەتىندە دامىتۋعا باعىتتالعان.
ايا كەتسەك، قىتاي حالىق رەسپۋبليكاسىنىڭ توراعاسى سي تسزينپين بىشكەكتە وتكەن VI دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسا الماعان. بۇعان قىتايدىڭ تيبەت اۆتونوميالىق اۋدانىنداعى تابيعي اپات سەبەپ بولعان.
ونىڭ ايتۋىنشا، سي ءتسزينپيننىڭ كوشپەندىلەر ويىندارىنىڭ اشىلۋ راسىمىنە قاتىسۋى قىرعىزستانعا جاساعان مەملەكەتتىك ساپارىنىڭ باعدارلاماسىندا جوسپارلانعان.
