اقش پرەزيدەنتى ترامپتىڭ بەيجىڭگە ساپارىنان سوڭ قىتايعا رەسەي پرەزيدەنتى ۆلاديمير پۋتين بارادى، دەپ حابارلايدى "ادىرنا" ۇلتتىق پورتالى.
كرەملدىڭ حابارلاۋىنشا، پۋتين قىتاي توراعاسى سي ءتسزينپيننىڭ شاقىرۋىمەن 19-20 مامىر كۇندەرى بەيجىڭگە رەسمي ساپارمەن كەلەدى.
كەلىسسوزدەر بارىسىندا تاراپتار ەكىجاقتى قارىم-قاتىناستى، جان-جاقتى ارىپتەستىك پەن ىنتىماقتاستىقتى نىعايتۋ ماسەلەلەرىن تالقىلايدى. سونىمەن قاتار ساپار قىتاي مەن رەسەي اراسىنداعى «تاتۋ كورشىلىك، دوستىق جانە ىنتىماقتاستىق تۋرالى» كەلىسىمنىڭ 25 جىلدىعىنا ورايلاستىرىلعان.
كرەمل مالىمەتىنشە، پۋتين مەن سي تسزينپين حالىقارالىق جانە وڭىرلىك وزەكتى ماسەلەلەر بويىنشا پىكىر الماسىپ، كەلىسسوزدەر قورىتىندىسى بويىنشا بىرلەسكەن مالىمدەمەگە قول قويۋدى جوسپارلاپ وتىر. سونداي-اق رەسەي پرەزيدەنتى قىتاي مەملەكەتتىك كەڭەسىنىڭ پرەمەرى لي تسيانمەن كەزدەسىپ، ەكونوميكا مەن ساۋدا سالاسىنداعى ىنتىماقتاستىقتى تالقىلايدى.
پۋتين ۋكرايناداعى سوعىس باستالعاننان بەرى قىتايعا تۇراقتى تۇردە بارىپ ءجۇر. بۇعان دەيىن ول 2023 جىلعى ء«بىر بەلدەۋ – ءبىر جول» فورۋمىنا، 2024 جىلعى پرەزيدەنتتىك سايلاۋدان كەيىنگى العاشقى شەتەلدىك ساپارىنا جانە 2025 جىلعى شىۇ سامميتىنە قاتىسۋ ءۇشىن بەيجىڭگە بارعان.
سونىمەن قاتار ۋكراينا سىرتقى ىستەر ءمينيسترى اندرەي سيبيگا قىتايدان شاقىرۋ العانىن مالىمدەدى. ونىڭ ايتۋىنشا، قازىر ساپاردىڭ ناقتى مەرزىمى كەلىسىلىپ جاتىر. سيبيگا بۇل ساپار ۋكراينا پرەزيدەنتى ۆلاديمير زەلەنسكيدىڭ قىتايعا ىقتيمال ساپارىنا دايىندىق بولۋى مۇمكىن ەكەنىن دە جوققا شىعارمادى.
