قازاقستاندا ءۇشىنشى اتوم ەلەكتر ستانتسياسىن (اەس) سالۋ بويىنشا قىتايلىق China National Nuclear Corporation (CNNC) كومپانياسىن قوسا العاندا، جوعارى، ورتا جانە شاعىن قۋاتتى رەاكتور وندىرۋشىلەرىمەن كەلىسسوزدەر جۇرگىزىلۋدە، دەپ حابارلايدى "ادىرنا" ۇلتتىق پورتالى.
بۇل تۋرالى اتوم ەنەرگياسى جونىندەگى اگەنتتىگى مالىمدەگەن.
ۆەدومستۆونىڭ حابارلاۋىنشا، قازىرگى تاڭدا الەۋەتتى ۆەندورلارمەن الدىن الا كەڭەستەر جۇرگىزىلىپ، قۇرىلىس مۇمكىندىكتەرى باعالانۋدا.
"ءۇشىنشى اەس-ءتى سالۋ بويىنشا CNNC سەكىلدى ءىرى كومپانيالارمەن كەلىسسوزدەر جالعاسىپ جاتىر. ازىرگە ناقتى شەشىم قابىلدانعان جوق. بارلىق قادامدار ەنەرگەتيكالىق تەڭگەرىم مەن ينفراقۇرىلىمدىق مۇمكىندىكتەرگە بايلانىستى زاڭناما اياسىندا جۇزەگە اسىرىلادى", — دەلىنگەن رەسمي حابارلامادا.
بۇعان دەيىن پرەمەر-ءمينيستردىڭ ءبىرىنشى ورىنباسارى رومان سكليار قازاقستانداعى جاڭا اەس قۇرىلىسىنا قىتاي تاراپى قاتىسۋى مۇمكىن ەكەنىن مالىمدەگەن ەدى.
ايتا كەتەيىك، قازىرگى تاڭدا قازاقستاندا ءبىرىنشى اەس-ءتى سالۋ ءۇشىن الماتى وبلىسىنداعى جامبىل اۋدانى تاڭدالعان. ەكىنشى ستانتسيا بويىنشا دا قىتايلىق CNNC كومپانياسى قاتىسۋى ىقتيمال ەكەنى 17 ماۋسىمدا بەلگىلى بولدى. بۇل باعىتتا دا مەملەكەتتىك ورگاندار مەن CNNC اراسىندا كەلىسسوزدەر ءجۇرىپ جاتىر.
