قحر مەملەكەتتىك كەڭەسىنىڭ پرەمەر-ءمينيسترى لي تسيان قازاقستاننىڭ پرەمەر-ءمينيسترى ءاليحان سمايىلوۆپەن كەزدەسۋ وتكىزدى، دەپ حابارلايدى "ادىرنا" ءتىلشىسى سينحۋا جاڭالىقتارىنا سىلتەمە جاساپ.
قحر پرەمەرى لي تسياننىڭ ايتۋىنشا، ەكى ەلدە ديپلوماتيالىق بايلانىستار ورناعان ساتتەن باستاپ قىتاي مەن قازاقستان اراسىنداعى قاتىناستار حالىقارالىق احۋالدىڭ وزگەرۋىنە قاراماستان، جاڭا دەڭگەيگە كوتەرىلىپ كەلەدى.
لي تسيان قىتاي-قازاقستان اراسىنداعى ەكىجاقتى ىنتىماقتاستىقتىڭ بارلىق اسپەكتىلەرىندە ماڭگىلىك دوستىق، ءوزارا سەنىم مەن ىنتىماقتاستىق تۇجىرىمداماسىن ىلگەرىلەتۋ، جاڭعىرتۋدى جۇزەگە اسىرۋدا ءبىر-بىرىنە قولداۋ كورسەتۋ جانە ەكى ەلدىڭ حالىقتارىنا ودان دا كوپ پايدا اكەلۋ ءۇشىن بىرلەسكەن كۇش-جىگەر جۇمساۋ ءۇشىن جۇمىس ىستەۋگە دايىن ەكەنىن ايتتى.
مەملەكەتتىك كەڭەستىڭ پرەمەر-ءمينيسترى ەكى ەلدى دە ء"بىر بەلدەۋ - ءبىر جولدىڭ" جوعارى ساپالى قۇرىلىسىن جالعاستىرۋعا، ساۋدانى كەڭەيتۋگە، وندىرىستىك قۋاتتار مەن ينۆەستيتسيا سىندى بىرقاتار سالالارداعى ىنتىماقتاستىقتى تەرەڭدەتۋگە، كەلىسسوزدەردى جەدەلدەتۋگە، جاڭا ەنەرگيا كوزدەرى سەكتورىنداعى كووپەراتسيانىڭ الەۋەتىن ارتتىرۋعا شاقىردى.
سونداي-اق قىتاي حالىق رەسپۋبليكاسىنىڭ پرەمەرى قازاقستاندى "قىتاي - ورتالىق ازيا" ءسامميتىن وتكىزۋدە جانە شانحاي ىنتىماقتاستىق ۇيىمىنا توراعالىق ەتۋدە قولدايتىنىن اتاپ ءوتتى.
قر ۇكىمەت باسشىسى ءاليحان سمايىلوۆ ءوز تاراپىنان قازاقستان ەكى ەلدىڭ ماڭگىلىك جان-جاقتى ستراتەگيالىق ارىپتەستىگىندە ەكىجاقتىڭ ىنتىماقتاستىق قارىم-قاتىناسىن جوعارى باعالايتىنىن، سونداي-اق قىتاي ۇسىنعان بىرقاتار ماڭىزدى باستامالاردى قولدايتىنىن جەتكىزدى.
"قازاقستان قىتايمەن بىرگە ء"بىر بەلدەۋ - ءبىر جول" باستاماسىن ىلگەرىلەتۋگە، ءتۇرلى سالالارداعى پراكتيكالىق كووپەراتسيانى نىعايتۋعا، تەرروريزممەن، سەپاراتيزممەن جانە ەكسترەميزممەن بىرلەسىپ كۇرەسۋگە، قىتاي ەو ورتالىق ازيا جانە شىۇ تەتىكتەرى شەڭبەرىندەگى ىنتىماقتاستىقتى تەرەڭدەتۋگە جانە قازاقستان مەن قىتايدىڭ ءبىرتۇتاس تاعدىرى قاۋىمداستىعىن بىرلەسىپ قۇرۋعا نيەتتى"-, دەپ مالىمدەدى پرەمەر-مينيستر.
