بۋرياتيادا ەلدى مەكەندەر مەن تۋريستىك نىساندار ماڭىندا ايۋلاردىڭ ءجيى پايدا بولۋىنا بايلانىستى قاۋىپسىزدىك شارالارى كۇشەيتىلدى، دەپ حابارلايدى "ادىرنا" ءتىلشىسى.
بۇل تۋرالى وڭىرلىك جانۋارلار دۇنيەسىن قورعاۋ، باقىلاۋ جانە پايدالانۋ باسقارماسى حابارلادى.
ۆەدومستۆو مالىمەتىنشە، ايۋ اۋلايتىن كاسىبي اڭشىلاردان قۇرالعان 17 بريگادا جاساقتالعان. ولار رەسپۋبليكانىڭ 10 اۋدانىندا جۇمىس ىستەيدى. تاعى 11 اۋداندا وسىنداي بريگادالاردى قۇرۋ جۇمىستارى جالعاسىپ جاتىر.
بريگادالار مەملەكەتتىك اڭشىلىق ينسپەكتورلارىمەن بىرلەسىپ جۇمىس ىستەيدى. ولار ايۋدىڭ تۇرعىن ۇيلەرگە جاقىنداعانى تۋرالى حابار تۇسكەن جاعدايدا وقيعا ورنىنا بارىپ، قاۋىپ راستالسا، جانۋاردى تابيعي ورتادان الۋ شارالارىن جۇرگىزەدى. سونىمەن قاتار وڭىردە قوعامدىق اڭشىلىق ينسپەكتورلارىنان قۇرالعان ءموبيلدى توپتار دا جۇمىس ىستەيدى.
قورىقتار مەن ۇلتتىق پاركتەردە ايۋ سانىن رەتتەۋ شارالارىن اكىمشىلىك وزدەرى جۇرگىزەدى. بۇل جۇمىستار تابيعاتتى قورعاۋ زاڭناماسىنا جانە كەلۋشىلەر مەن ەكوجۇيەگە تونەتىن قاۋىپ دەڭگەيىنە سايكەس جۇزەگە اسىرىلادى.
جىل باسىنان بەرى بۋرياتيادا ايۋلاردىڭ ەلدى مەكەندەر، اۆتوموبيل جولدارى، تۋريستىك جانە وندىرىستىك نىساندار ماڭىندا پايدا بولعان 52 جاعدايى تىركەلگەن. ماماندار مۇنىڭ نەگىزگى سەبەپتەرى رەتىندە مالدى باقىلاۋسىز جايۋدى، رەتسىز قوقىس ورىندارىنىڭ بولۋىن جانە تۇرعىن ۇيلەردىڭ تايگاعا جاقىن ورنالاسۋىن اتاپ وتىر.
ايۋلاردىڭ ەلدى مەكەندەرگە شىعۋ جاعدايلارىنىڭ جيىلەۋىنە بايلانىستى قاۋىپسىزدىك شارالارىن كۇشەيتۋ تۋرالى شەشىم 25 تامىزدان باستاپ ءوڭىر باسشىسى الەكسەي تسىدەنوۆتىڭ تاپسىرماسىمەن جۇزەگە اسىرىلىپ جاتىر.
سونىمەن قاتار بۋرياتيا ۇكىمەتى ايۋلاردى زاڭدى تۇردە اۋلاۋدى ىنتالاندىرۋ ءۇشىن ءاربىر اۋلانعان ايۋعا 6 مىڭ رۋبل كولەمىندە تولەم بەلگىلەدى. 2026 جىلعا بۇل ماقساتقا ءوڭىر بيۋدجەتىنەن 4,7 ميلليون رۋبلدەن استام قاراجات بولىنگەن.
قازىر اڭشىلاردان 50 ءوتىنىش تۇسكەن. ونىڭ 45-ءى بويىنشا ءتيىستى تولەمدەر جۇرگىزىلگەن.
