ءۇندىستان پرەمەر-ءمينيسترى نارەندرا مودي ۋكرايناداعى «شەكسىز سوعىستى» توقتاتىپ، اسكەري قيمىلداردى اياقتاۋعا شاقىردى، دەپ حابارلايدى "ادىرنا" ءتىلشىسى.
بۇل تۋرالى ول بىشكەكتە ءوتىپ جاتقان شانحاي ىنتىماقتاستىق ۇيىمىنىڭ سامميتىندە رەسەي پرەزيدەنتى ۆلاديمير پۋتينمەن كەزدەسۋدە ايتتى.
مودي سوعىس جالعاسقان سايىن ادامزاتتىڭ ءبىر قادام ارتقا شەگىنەتىنىن اتاپ ءوتتى. ونىڭ ايتۋىنشا، تاراپتار قاقتىعىستى توقتاتىپ، بەيبىت رەتتەۋگە باعىت الۋى كەرەك.
ء«بىز شەكسىز سوعىستان سوعىستىڭ اياقتالۋىنا، اسكەري قيمىلداردىڭ توقتاۋىنا كوشۋىمىز قاجەت. بۇل باعىتتا قوزعالۋ بۇكىل ادامزات ءۇشىن وتە ماڭىزدى»، – دەدى ءۇندىستان پرەمەر-ءمينيسترى.
ءوز كەزەگىندە ۆلاديمير پۋتين رەسەيدىڭ وسى باعىتتا ارەكەت ەتىپ جاتقانىن ايتتى.
«راقمەت. ءبىز وسى جولمەن كەلە جاتىرمىز»، – دەدى رەسەي پرەزيدەنتى.
مودي مەن پۋتين ۋكرايناداعى جاعدايدى رەتتەۋ ماسەلەسىن بىشكەكتەگى كەزدەسۋدە، سونداي-اق قىركۇيەكتە ءۇندىستاندا وتەتىن بريكس سامميتىندە تالقىلاۋدى جوسپارلاپ وتىر.
ايتا كەتەيىك، بۇعان دەيىن قازاقستان پرەزيدەنتى ومبىدا رەسەي باسشىسىمەن كەزدەسكەندە رەسەي-ۋكراينا قاقتىعىسىن ۋاقىتشا توقتاتۋعا شاقىرعانىن جازعان ەدىك.
