اقمولا وبلىسىنىڭ اتباسار قالاسىنداعى تۇزەۋ مەكەمەسىندە جازاسىن وتەپ جاتقان ازاماتتىڭ ولىمىنە قاتىستى قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
مارقۇمنىڭ تۋىستارى ونىڭ قازاسىنا بايلانىستى رەسمي نۇسقاعا كۇمان كەلتىرىپ، ءىستى جان-جاقتى تەكسەرۋدى تالاپ ەتىپ وتىر.
قازان ايىندا بوستاندىققا شىعۋى ءتيىس بولعان ەر ادامنىڭ قايتىس بولعانى تۋرالى تۋىستارىنا 9 قازاندا حابارلانعان. قىلمىستىق-اتقارۋ جۇيەسى كوميتەتىنىڭ مالىمەتىنشە، سوتتالعان ازامات وزىنە قول جۇمساعان. الايدا مارقۇمنىڭ جاقىندارى بۇل نۇسقامەن كەلىسپەيدى.
مارقۇمنىڭ قاراقات ەسىمدى اپكەسى قازاقستاننىڭ باس پروكۋراتۋراسى مەن ىشكى ىستەر مينيسترلىگىنە بەينەۇندەۋ جولداعان. ونىڭ ايتۋىنشا، اعاسى بوستاندىققا شىعاتىن كۇنىن كۇتىپ، الداعى ومىرىنە جوسپار قۇرعان. سونداي-اق ول جازاسىن وتەۋ كەزىندە ءتارتىپ بۇزباعانىن ايتىپ، ءولىمىنىڭ ءمان-جايىن تولىق انىقتاۋدى سۇراعان.
«2026 جىلعى 9 قازاندا وتباسىمىز قارالى حابار الدى. اتباسارداعى تۇزەۋ مەكەمەسىندە جازاسىن وتەپ جاتقان اعامنىڭ قايتىس بولعانىن حابارلادى. ونىڭ وزىنە قول جۇمساعانىن ايتتى. بىراق اعام ءومىر سۇرگىسى كەلەتىن، بولاشاققا جوسپارى بار ادام ەدى. مەن باس پروكۋراتۋرا مەن ىشكى ىستەر مينيسترلىگىنەن كومەك سۇرايمىن. بەينەباقىلاۋ كامەرالارىنداعى بارلىق جازبانى كورسەتۋدى تالاپ ەتەمىن»، – دەدى مارقۇمنىڭ اپكەسى.
تۋىستارى بۇعان دەيىن مارقۇمنىڭ دەنەسىندە مەكەمە اكىمشىلىگىن ايىپتايتىن جازۋ بولعانىن دا مالىمدەگەن. الايدا بۇل اقپارات رەسمي تۇردە راستالعان جوق.
قىلمىستىق-اتقارۋ جۇيەسى كوميتەتىنىڭ حابارلاۋىنشا، وقيعا ورنىن تەكسەرۋ بارىسىندا مارقۇمنىڭ دەنەسىنەن دەنە جاراقاتتارى انىقتالماعان. ۆەدومستۆو وكىلدەرى سوتتالعان ازاماتتىڭ ولەر الدىندا جازبا قالدىرعانى تۋرالى اقپاراتتى دا جوققا شىعاردى.
«سوتتالعان ازاماتتىڭ ولەر الدىندا جازبا قالدىرعانى تۋرالى مالىمەت شىندىققا سايكەس كەلمەيدى. وقيعا ورنىن تەكسەرۋ كەزىندە مۇنداي جازبا تابىلعان جوق»، – دەپ حابارلادى كوميتەت.
وقيعا ورنىنان بەينەباقىلاۋ كامەرالارىنىڭ جازبالارى الىنعان. قازىر تەرگەۋشىلەر ەر ادامنىڭ ولىمىنە اكەلگەن جاعدايلاردى انىقتاپ جاتىر. كوميتەت تەرگەۋ بارىسى باقىلاۋدا ەكەنىن حابارلادى.
