مۋزەيدەگى ۇرلىق. مىسىر پاتشايىمىنىڭ گاۋھار القاسى قولدى بولدى

ۆەنا قالاسىنداعى قولدانبالى ونەر مۋزەيىنەن مىسىردىڭ سوڭعى پاتشايىمى نازليگە تيەسىلى تاريحي القا ۇرلاندى، دەپ حابارلايدى "ادىرنا" ءتىلشىسى.

قۇنى جوعارى زەرگەرلىك بۇيىمدى ەكى ەر ادام كۇندىز، مۋزەي كەلۋشىلەرگە اشىق كەزدە الىپ كەتكەن. پوليتسيا مالىمەتىنشە، كۇدىكتىلەر بەتتەرىن جاسىرماي، كادىمگى كەلۋشىلەر رەتىندە مۋزەيگە كىرگەن. كەيىن ولاردىڭ ءبىرى بالعامەن اينەك ۆيترينانى سىندىرىپ، ىشىندەگى القانى الىپ، وقيعا ورنىنان قاشىپ كەتكەن. وقيعا كەزىندە مۋزەيدە باسقا كەلۋشىلەر بولعانىمەن، ەشكىم زارداپ شەكپەگەن.

بەينەباقىلاۋ كامەرالارى كۇدىكتىلەردى ءتۇسىرىپ العان. پوليتسيا ولاردىڭ سۋرەتتەرىن جاريالاپ، ىزدەۋگە كومەكتەسۋدى سۇرادى. قۇقىق قورعاۋشىلار ۆەنا ورتالىعىن تەكسەرىپ، ىزدەۋ جۇمىستارىنا قىزمەتتىك يتتەردى دە تارتقان.

ۇرلانعان القا 1939 جىلى جاسالعان جانە مىسىر پاتشايىمى نازليگە تيەسىلى بولعان. ول القانى قىزى فاۋزيا حانشايىمنىڭ يراننىڭ مۇراگەر حانزاداسى مۇحاممەد رەزا پەحلەۆيمەن ۇيلەنۋ تويىندا تاققان. كەيىن مۇحاممەد رەزا پەحلەۆي يراننىڭ سوڭعى شاحى اتاندى.

پلاتينادان جاسالعان زەرگەرلىك بۇيىمنىڭ سالماعى شامامەن 200 كارات، وعان 673 گاۋھار تاس ورناتىلعان. 2015 جىلى القا نيۋ-يوركتەگى Sotheby's اۋكتسيونىندا 4,3 ميلليون دوللارعا ساتىلعان.

القا ۆەناداعى Van Cleef & Arpels زەرگەرلىك ءۇيىنىڭ تاريحىنا ارنالعان كورمەدە قويىلعان. كورمەدە برەندتىڭ 120 جىلدىق تاريحىن قامتيتىن جۇزدەگەن زەرگەرلىك بۇيىم مەن تاريحي جادىگەر ۇسىنىلعان.

قىلمىستان كەيىن كورمە ۋاقىتشا جابىلدى. ول 27 قىركۇيەككە دەيىن جۇمىس ىستەۋى ءتيىس بولعان. اۆستريالىق تەرگەۋشىلەر ۇرلىقتىڭ الدىن الا جوسپارلانعان بولۋى مۇمكىن دەگەن نۇسقانى دا قاراستىرىپ جاتىر.