Vena qalasyndaǧy Qoldanbaly öner muzeiınen Mysyrdyŋ soŋǧy patşaiymy Nazlige tiesılı tarihi alqa ūrlandy, dep habarlaidy "Adyrna" tılşısı.
Qūny joǧary zergerlık būiymdy ekı er adam kündız, muzei keluşılerge aşyq kezde alyp ketken. Polisiia mälımetınşe, küdıktıler betterın jasyrmai, kädımgı keluşıler retınde muzeige kırgen. Keiın olardyŋ bırı balǧamen äinek vitrinany syndyryp, ışındegı alqany alyp, oqiǧa ornynan qaşyp ketken. Oqiǧa kezınde muzeide basqa keluşıler bolǧanymen, eşkım zardap şekpegen.
Beinebaqylau kameralary küdıktılerdı tüsırıp alǧan. Polisiia olardyŋ suretterın jariialap, ızdeuge kömektesudı sūrady. Qūqyq qorǧauşylar Vena ortalyǧyn tekserıp, ızdeu jūmystaryna qyzmettık itterdı de tartqan.
Ūrlanǧan alqa 1939 jyly jasalǧan jäne Mysyr patşaiymy Nazlige tiesılı bolǧan. Ol alqany qyzy Fauziia hanşaiymnyŋ İrannyŋ mūrager hanzadasy Mūhammed Reza Pehlevimen üilenu toiynda taqqan. Keiın Mūhammed Reza Pehlevi İrannyŋ soŋǧy şahy atandy.
Platinadan jasalǧan zergerlık būiymnyŋ salmaǧy şamamen 200 karat, oǧan 673 gauhar tas ornatylǧan. 2015 jyly alqa Niu-Iorktegı Sotheby's auksionynda 4,3 million dollarǧa satylǧan.
Alqa Venadaǧy Van Cleef & Arpels zergerlık üiınıŋ tarihyna arnalǧan körmede qoiylǧan. Körmede brendtıŋ 120 jyldyq tarihyn qamtityn jüzdegen zergerlık būiym men tarihi jädıger ūsynylǧan.
Qylmystan keiın körme uaqytşa jabyldy. Ol 27 qyrküiekke deiın jūmys ısteuı tiıs bolǧan. Avstriialyq tergeuşıler ūrlyqtyŋ aldyn ala josparlanǧan boluy mümkın degen nūsqany da qarastyryp jatyr.
