كوكشەتاۋدا قالا دامۋىنا ارنالعان تەحنولوگيالىق شەشىمدەر ازىرلەيتىن ستارتاپتار مەن كوماندالارعا ارنالعان ەكى ايلىق Smart City Accelerator باعدارلاماسىنا ءوتىنىم قابىلداۋ باستالدى. جوبانى «Aqmola Hub» وڭىرلىك IT-حابى Digital Aqmola-مەن بىرلەسىپ جۇزەگە اسىرۋدا. باعدارلاما تۋرالى وكق بريفينگىندە «Aqmola Hub» ديرەكتورى اسەل ابدراحمانوۆا مالىمدەدى.
قاتىسۋشىلار ءوز جوبالارىن ءتورت باعىت بويىنشا ۇسىنا الادى. ولار: اۋىل شارۋاشىلىعى جانە تابيعي رەسۋرستار، قالالىق ينفراقۇرىلىم جانە مەملەكەتتىك قىزمەتتەر، ەكولوگيا جانە قورشاعان ورتانىڭ جاي-كۇيىن مونيتورينگتەۋ، سونداي-اق كولىك، موبيلدىلىك جانە تۋريزم.
اكسەلەراتوردىڭ باستى ەرەكشەلىگى – قاتىسۋشىلارعا ساراپشىلاردىڭ كومەگىمەن ءوز يدەيالارىن جەتىلدىرىپ، ولاردى ناقتى جاعدايدا قولدانۋعا دايىنداۋعا مۇمكىندىك بەرىلەدى. باعدارلاما بارىسىندا كوماندالار ترەكەرلەرمەن، سونداي-اق بيزنەس-مودەلدەۋ، يۋنيت-ەكونوميكا، ءونىمدى دامىتۋ، ماركەتينگ، PR, جوبانى تانىستىرۋ جانە قورعاۋ، كوپشىلىك الدىندا ءسوز سويلەۋ باعىتتارى بويىنشا ماماندارمەن جۇمىس ىستەيدى.
ء«بىز كوماندالارعا ءوز يدەيالارىن ۇسىنىپ قانا قويماي، ونىمدەرىن قالالىق ورتانىڭ ناقتى قاجەتتىلىكتەرىنە بەيىمدەۋگە مۇمكىندىك بەرگىمىز كەلەدى. ناتيجەسىندە ۇزدىك شەشىمدەر ازىرلەۋ كەزەڭىنەن پيلوتتىق جوبا رەتىندە ىسكە اسىرۋعا دەيىن جەتۋى مۇمكىن»، – دەدى اسەل ابدراحمانوۆا.
باعدارلاما ساراپشىلارىنىڭ قاتارىندا اندرەي كريۋكوۆ، مەيىربەك مۇقاتوۆ، مارات شاكەن، اقبوتا مۇسا، يلياس باتىروۆ جانە باسقا دا تاجىريبەلى ماماندار بار.
باعدارلاما 10 قاراشادا وتەتىن Demo Day شاراسىمەن قورىتىندىلانادى. وندا قاتىسۋشىلار ءوز جوبالارىن قالالىق قىزمەتتەر مەن مەملەكەتتىك ورگاندار وكىلدەرىنە، سونداي-اق ينۆەستورلارعا تانىستىرادى. ەڭ پەرسپەكتيۆالى جوبالار كوكشەتاۋدا پيلوتتىق رەجيمدە ەنگىزىلۋى مۇمكىن.
