28 تامىز كۇنى الماتى اۋەجايىندا FlyArystan اۋە كومپانياسىنىڭ ۇشاعىندا ءورت شىقتى. وقيعا تەحنيكالىق جۇمىستار جۇرگىزىلىپ جاتقان كەزدە بولعان. ءورت تەز ارادا ءسوندىرىلدى. الايدا Air Astana توبىنىڭ ءبىر قىزمەتكەرى جاراقات الدى. بۇل تۋرالى Tengri Travel جازدى، دەپ حابارلايدى "ادىرنا".
اۋە تاسىمالداۋشىنىڭ مالىمەتىنشە، وقيعا كەزىندە ۇشاقتا جوسپارلى تەحنيكالىق جۇمىستار جۇرگىزىلىپ جاتقان. جۇمىس بارىسىندا جەرگىلىكتى سيپاتتاعى ءورت شىققان.
«جۇمىستاردى جۇرگىزۋ كەزىندە جەرگىلىكتى ءورت شىقتى. ونى اۋەجايدىڭ جەدەل قىزمەتتەرى شۇعىل تۇردە ءسوندىردى»، — دەپ حابارلادى كومپانيا.
ءورتتىڭ ناقتى نەدەن شىققانى ازىرگە بەلگىسىز. قازىر وقيعانىڭ ءمان-جايىن اۋە كومپانياسى الماتى اۋەجايىمەن بىرلەسىپ انىقتاپ جاتىر.
وقيعا كەزىندە ۇشاقتىڭ بورتىندا جولاۋشىلار دا، ەكيپاج مۇشەلەرى دە بولماعان.
سونىمەن قاتار، وقيعا بارىسىندا ءبىر قىزمەتكەر زارداپ شەكتى. وعان مەديتسينالىق كومەك كورسەتىلىپ، كەيىن اۋرۋحانادان ۇيىنە جىبەرىلدى.
«Air Astana توبىنىڭ قىزمەتكەرى جاراقات الدى. وعان مەديتسينالىق كومەك كورسەتىلىپ، كەيىن اۋرۋحانادان بوساتىلدى»، — دەلىنگەن كومپانيا مالىمدەمەسىندە.
وقيعادان كەيىن اۋە كەمەسى ۋاقىتشا پايدالانۋدان شىعارىلدى. قازىر ماماندار ۇشاقتىڭ قانشالىقتى زاقىمدانعانىن باعالاپ، قاجەتتى جوندەۋ جۇمىستارىن جۇرگىزىپ جاتىر.
«اۋە كەمەسى ۋاقىتشا پايدالانۋدان شىعارىلدى. قازىرگى ۋاقىتتا زاقىمدانۋ دەڭگەيى باعالانىپ، قاجەتتى جوندەۋ جۇمىستارى جۇرگىزىلۋدە. Air Astana توبى الماتى حالىقارالىق اۋەجايىمەن بىرلەسىپ، بولعان وندىرىستىك وقيعانىڭ ءمان-جايىن انىقتاپ جاتىر»، — دەپ حابارلادى اۋە كومپانياسى.
وقيعانىڭ سەبەپتەرى مەن باسقا دا مالىمەتتەر ازىرگە ناقتىلانىپ جاتىر.
