28 тамыз күні Алматы әуежайында FlyArystan әуе компаниясының ұшағында өрт шықты. Оқиға техникалық жұмыстар жүргізіліп жатқан кезде болған. Өрт тез арада сөндірілді. Алайда Air Astana тобының бір қызметкері жарақат алды. Бұл туралы Tengri Travel жазды, деп хабарлайды "Адырна".
Әуе тасымалдаушының мәліметінше, оқиға кезінде ұшақта жоспарлы техникалық жұмыстар жүргізіліп жатқан. Жұмыс барысында жергілікті сипаттағы өрт шыққан.
«Жұмыстарды жүргізу кезінде жергілікті өрт шықты. Оны әуежайдың жедел қызметтері шұғыл түрде сөндірді», — деп хабарлады компания.
Өрттің нақты неден шыққаны әзірге белгісіз. Қазір оқиғаның мән-жайын әуе компаниясы Алматы әуежайымен бірлесіп анықтап жатыр.
Оқиға кезінде ұшақтың бортында жолаушылар да, экипаж мүшелері де болмаған.
Сонымен қатар, оқиға барысында бір қызметкер зардап шекті. Оған медициналық көмек көрсетіліп, кейін ауруханадан үйіне жіберілді.
«Air Astana тобының қызметкері жарақат алды. Оған медициналық көмек көрсетіліп, кейін ауруханадан босатылды», — делінген компания мәлімдемесінде.
Оқиғадан кейін әуе кемесі уақытша пайдаланудан шығарылды. Қазір мамандар ұшақтың қаншалықты зақымданғанын бағалап, қажетті жөндеу жұмыстарын жүргізіп жатыр.
«Әуе кемесі уақытша пайдаланудан шығарылды. Қазіргі уақытта зақымдану деңгейі бағаланып, қажетті жөндеу жұмыстары жүргізілуде. Air Astana тобы Алматы халықаралық әуежайымен бірлесіп, болған өндірістік оқиғаның мән-жайын анықтап жатыр», — деп хабарлады әуе компаниясы.
Оқиғаның себептері мен басқа да мәліметтер әзірге нақтыланып жатыр.
