اقمولا وبلىسىنىڭ زەرەندى اۋدانىندا وراق ناۋقانى قارقىن الىپ كەلەدى. «نامىس» شارۋا قوجالىعىندا ءداندى داقىلداردىڭ ورتاشا ونىمدىلىگى گەكتارىنا شامامەن 28 تسەنتنەردى قۇراپ، كلەيكوۆينا مولشەرى 28%-عا جەتۋدە. دالا جۇمىستارىنىڭ بارىسىن اقمولا وبلىسىنىڭ اكىمى مارات احمەتجانوۆ باعالادى.
وبلىس اكىمى ەگىن جيناۋ بارىسىمەن تانىسىپ، مەحانيزاتورلارمەن تىلدەستى. ول استىقتىڭ ساپالىق كورسەتكىشتەرى جوعارى ەكەنىن اتاپ ءوتىپ، ەگىننىڭ كولەمىنە قاتىستى تۇپكىلىكتى قورىتىندى جاساۋعا ءالى ەرتە ەكەنىن ايتتى. ويتكەنى وراق ناۋقانى نەگىزگى القاپتارعا ەندى عانا جەتىپ وتىر.
«بيىل مەملەكەت باسشىسىنىڭ تاپسىرماسىنا سايكەس مەملەكەت تاراپىنان قوماقتى قولداۋ كورسەتىلدى. «كەڭ دالا» باعدارلاماسى بويىنشا مىڭنان استام شارۋاشىلىق جەڭىلدەتىلگەن نەسيە الدى. سونداي-اق ارزانداتىلعان جانار-جاعارماي مەن مينەرالدى تىڭايتقىشتار ءبولىندى. وسىنىڭ ارقاسىندا، زاماناۋي تەحنولوگيالاردى، عىلىمي تاسىلدەردى قولدانۋ جانە اگرارشىلاردىڭ ەڭبەگىنىڭ ناتيجەسىندە اۋا رايى ءاردايىم قولايلى بولا بەرمەگەنىنە قاراماستان، جاقسى ءونىم الىپ وتىرمىز»، – دەدى مارات احمەتجانوۆ.
قازىر مەحانيزاتورلار ءۇشىن باستى مىندەت – ەگىندى وڭتايلى مەرزىمدە جيناپ، ءونىمنىڭ ىسىراپ بولۋىنا جول بەرمەۋ. ماناربەك بايمانوۆ وسى سالادا 20 جىل ەڭبەك ەتىپ كەلەدى، ونىڭ سوڭعى التى ماۋسىمى «نامىس» شارۋاشىلىعىندا ءوتىپ جاتىر. ونىڭ ايتۋىنشا، بيىلعى ءونىم تەك جوعارى ونىمدىلىگىمەن عانا ەمەس، استىق ساپاسىنىڭ جوعارىلىعىمەن دە ەرەكشەلەنەدى.
«وتكەن جىلمەن سالىستىرعاندا كەيبىر اۋدانداردا ونىمدىلىك كورسەتكىشى ءتىپتى جوعارى. بيىلعى ءونىمنىڭ ساپاسى دا جاقسى. اۋا رايى قولايلى بولسا، وراق جۇمىستارىن قىركۇيەك ايىندا تولىق اياقتاۋدى جوسپارلاپ وتىرمىز»، – دەدى مەحانيزاتور.
بۇگىندە وراق ناۋقانى وبلىستىڭ بارلىق اۋماعىندا قارقىن الىپ كەلەدى. جاپپاي ەگىن جيناۋ جۇمىستارى تامىز ايىنىڭ ورتاسىندا باستالدى. قازىرگى ۋاقىتتا 4,5 ملن گەكتار استىق القابىنىڭ شامامەن 1,6 ملن گەكتارى، ياعني ۇشتەن بىرىنەن استامى جينالدى. ورتاشا ونىمدىلىك گەكتارىنا 12,3 تسەنتنەردى قۇراپ، 2 ملن توننادان استام استىق باستىرىلدى. ەگىن جيناۋ قارقىنى بويىنشا زەرەندى، بۋراباي، ساندىقتاۋ جانە بۇلاندى اۋداندارى كوش باستاپ تۇر.
وراق ناۋقانىنىڭ قارقىنىن ساقتاۋ ءۇشىن وبلىستىڭ شارۋاشىلىقتارى قاجەتتى رەسۋرستارمەن قامتاماسىز ەتىلگەن. دالا جۇمىستارىنا 14 مىڭنان استام اۋىل شارۋاشىلىعى تەحنيكاسى، ونىڭ ىشىندە شامامەن 7 مىڭ استىق جينايتىن كومباين جۇمىلدىرىلدى. ولاردىڭ 70%-عا جۋىعى – زاماناۋي جوعارى ءونىمدى تەحنيكا.
كۇزگى دالا جۇمىستارى كەزەڭىندە اگرارشىلارعا 81 مىڭ توننادان استام ارزانداتىلعان ديزەل وتىنى ءبولىندى. سونىمەن قاتار شارۋاشىلىقتار شامامەن 350 مىڭ توننا مينەرالدى تىڭايتقىش ساتىپ الدى، ونىڭ باسىم بولىگى القاپتارعا ەنگىزىلدى.
وراق ناۋقانىنىڭ العاشقى ناتيجەلەرى استىق قابىلداۋ كاسىپورىندارىنا تۇسۋدە. ەلەۆاتورلارعا 500 مىڭ توننادان استام استىق جونەلتىلدى. ونىڭ ىشىندە ساپالىق كورسەتكىشتەرى جوعارى Hi-Pro بيدايىنىڭ كولەمى شامامەن 250 مىڭ توننانى قۇرايدى.
وتكەن جىلى اقمولا وبلىسى رەكوردتىق 7,6 ملن توننا استىق جيناعان بولاتىن. بيىلعى ماۋسىمدا اگرارشىلار ازىرگە ناقتى بولجام جاساۋعا اسىقپايدى، ويتكەنى القاپتاردىڭ ۇشتەن ءبىرى عانا جينالدى. قازىرگى باستى مىندەت – قالىپتاسقان قارقىندى ساقتاپ، جۇمىس ىستەۋگە قولايلى ءار كۇندى ءتيىمدى پايدالانا وتىرىپ، ءونىمدى بارىنشا از شىعىنمەن جيناۋ.
