قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين جۋرناليست، ءماجىلىس دەپۋتاتى نارتاي ارالبايۇلىنىڭ يۋتۋب-ارناسىنا سۇحبات بەرىپ، ەلىمىزدەگى بىرقاتار ماسەلەلەردى ءسوز ەتتى. ءبىلىم بەرۋ جۇيەسىندەگى ماسەلەلەردىڭ ءمانىن اشىپ، ەلىمىزدەگى ءبىر توپ جاستاردىڭ تەحنولوگيا مەن يننوۆاتسيالىق دەگەن قۇشتارلىعىن ءوز تاجىريبەسىمەن ۇشتاستىرا اڭگىمەلەپ بەردى، دەپ حابارلايدى "ادىرنا" ۇلتتىق پورتالى.
- قازىر ءتۇرلى-ءتۇرلى مەكتەپتەر پايدا بولىپ جاتىر. جەكەمەنشىك مەكتەپتەر دە كوپ. مەكتەپتەردەگى ءبىلىم بەرۋ ءادىسى ءارتۇرلى. ولار كەيدە اۋليە ۆالەنتين كۇنىن تويلايدى، بىراق ناۋرىز، رەسپۋبليكا كۇنىن اتاپ ءوتىپ جاتقانىن ەستىمەيسىڭ... ءبىزدىڭ مىندەت ءبىلىمدى ادامدى قالىپتاستىرۋ ما، الدە ءبىلىمدى، تاربيەلى ءارى مادەنيەتتى ادامدى قالىپتاستىرۋ ما؟ كۇندەلىكتى ومىردە بالالارىمىزدىڭ كوپ ءتىل بىلگەنىن، ءبىلىمدى بولعانىن قالايمىز؟ بىراق قانداي تاربيە بەرىلىپ جاتىر؟ وعان ءمان بەرە بەرمەيمىز. سودان سوڭ تاڭ قالامىز، - دەدى ەرلان قارين.
ەرلان قارين ءجۋرناليستىڭ بالا تاربيەسى مەن اتا-انانىڭ ەكونوميكالىق جاعدايىن بايلانىستىرا قويعان ساۋالىنا ءوزىنىڭ ومىرلىك تاجىريبەسىمەن جاۋاپ قاتتى. ءوز اتا-اناسىن مىسال ەتە وتىرىپ جاۋاپ بەردى. وتپەلى زاماندا ءومىر سۇرگەن بۋىننىڭ قيىندىقتى كوپ كورسە دە، بالا تاربيەسىن اقساتپاعانىن اتاپ ءوتتى. Cاياساتكەردىڭ ايتۋىنشا، قازىرگى تاڭدا اتا-انالار بالا تاربيەسىنە مەيىلىنشە ءجىتى كوڭىل ءبولۋى ءتيىس.
سونىمەن قاتار، ەرلان قارين استانا قالاسىنداعى ءبىر توپ جاستاردىڭ يننوۆاتسيا مەن تەحنولوگياعا دەگەن قۇشتارلىعىن بايقاپ، ەرەكشە ريزا بولعانىن بايانداپ بەردى.
- جاقىندا مەنىمەن استاناداعى فيزيكا-ماتەماتيكالىق باعىتتاعى مەكتەپتىڭ وقۋشىلارى بايلانىستى. ولار زىمىران قۇرۋ بويىنشا العاش رەت رەسپۋبليكالىق بايقاۋ ۇيىمداستىرىپ جاتىر ەكەن. ماعان: "كونكۋرستى رەسپۋبليكالىق دەڭگەيدە ۇيىمداستىرىپ جاتىر ەدىك. سوعان قولداۋ كورسەتە الاسىز با؟" - دەدى. اقپاراتتىق قولداۋ كورسەتۋىمدى سۇرادى. مەنى قىزىقتىرعانى - وقۋشى جاستاردىڭ قيىن سالاعا ىنتا ءبىلدىرىپ وتىرعانى. وزدەرى كونكۋرستى جاريالاپ قويعان. قازىردىڭ وزىندە وڭىرلەردەگى 130 بالادان ءوتىنىش كەلىپ ءتۇسىپتى. سولاردى ىرىكتەۋدەن وتكىزىپ، ون كومانداعا بولەمىز دەيدى. قازاقستانداعى عارىش ۇيىمىمەن كەلىسىمدەرى بار ەكەندىگىن دە ايتتى... تاڭعالدىرعانى، بىرىنشىدەن، وقۋشى بالالاردىڭ ينجەنەرلىككە دەگەن ىنتالارى، ەكىنشىدەن، ۇيىمداستىرۋشىلىق قابىلەتتەرىنىڭ جوعارى بولۋى، - دەدى ساياساتكەر.
سۇحبات بارىسىندا زىمىران قۇرۋعا قاتىستى جاستاردىڭ جوبالارىن كەڭىنەن بايانداپ قانا قويماي، "جاستار كەڭەسىنىڭ" تۇجىرىمداماسى، جاستارعا دەگەن جەڭىلدىكتەر جايى دا ءسوز بولدى.
"ادىرنا" ۇلتتىق پورتالى
