قاراعاندىداعى زاۋىتتا بولعان اپاتتىڭ سەبەبى انىقتالدى، دەپ حابارلايدى “ادىرنا” ۇلتتىق پورتالى ktk.kz-كە سىلتەپ.
فەرروقورىتۋ زاۋىتىنداعى اپات ءتورت ادامنىڭ ءومىرىن جالماعان بولاتىن. شىلدە ايىندا بولعان اپاتتىڭ سەبەپتەرىن زەرتتەگەن ارنايى كوميسسيا كىنالى جۇمىس بەرۋشى دەپ تاپتى.
فەرروقورىتۋ زاۋىتىنداعى اپات 20 شىلدە كۇنى ورىن الدى.
زاۋىتتاعى پەشتەن كەنەتتەن اتقىلاعان ىستىق جالىن سەگىز ادامدى شارپىدى. ونىڭ تورتەۋى قازا تاۋىپ، دەنەسىن كۇيىك شالعاندارعا شۇعىل كومەك كورسەتىلدى. ەكى جۇمىسشى ءبىر ايدان بەرى اۋرۋحانادا جاتىر.
“كاسىپورىندا جاراقات الۋ فاكتورلارىن بولدىرماۋ ءۇشىن شۇعىل شارالار ءتيىستى دەڭگەيدە قابىلدانباعان. قاۋىپسىز ەڭبەك جاعدايى مەن قىزمەتكەرلەردىڭ ەرەجەلەردى، نۇسقاۋلىقتاردى جانە تەحنولوگيالىق ءتارتىپتى ساقتاۋىن باقىلاۋدى ءتيىستى دارەجەدە ىستەمەگەن”، - دەدى قر ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆ.
