2025 جىلدىڭ 26 قاڭتارىنا بەلارۋس رەسپۋبليكاسىندا پرەزيدەنت سايلاۋى وتەتىنى ءمالىم بولدى، دەپ حابارلايدى “ادىرنا” ۇلتتىق پورتالى.
فەرعانا اگەنتتىگىنىڭ مالىمەتىنشە، وسىعان بايلانىستى بەلارۋس رەسپۋبليكاسىنىڭ بۇرىنعى سايلاۋىندا سايلانعان پرەزيدەنتى اتالعان سۆەتلانا تيحانوۆسكايا، بەلارۋستىڭ بىرىككەن وتپەلى كابينەتى جانە بەلارۋستىڭ ۇيلەستىرۋ كەڭەسى «2025 جىلعى "سايلاۋعا" بايلانىستى بەلارۋستىڭ دەموكراتيالىق كۇشتەرىنىڭ ورتاق مالىمدەمەسى» اتتى قۇجاتتى جاريالادى.
مالىمدەمە اۆتورلارى:
«سايلاۋ ناۋقانى بەلارۋس رەسپۋبليكاسىنداعى تەرەڭ ساياسي داعدارىس جاعدايىندا ءوتىپ جاتىر. الەكساندر لۋكاشەنكو بيلىكتى زاڭسىز ۇستاپ وتىر جانە بەلارۋس قوعامىنا قارسى رەپرەسسيالار ارقىلى ءوزىنىڭ ورنىن ساقتاۋدا كرەملدىڭ قولداۋىنا سۇيەنۋدە»، – دەپ اتاپ وتكەن.
سونداي-اق، مالىمدەمەدە «بارلىق رەپرەسسيالاردى توقتاتۋ، بارلىق ساياسي تۇتقىنداردى بوساتۋ، بەلارۋس ازاماتتارىنىڭ تۇرعىلىقتى جەرىنە قاراماستان سايلاۋعا تولىققاندى قاتىسۋ قۇقىعىن جۇزەگە اسىرۋ، جينالىس بوستاندىعىن قامتاماسىز ەتۋ جانە بۇقارالىق اقپارات قۇرالدارىنا تەڭدەي قول جەتكىزۋ، سايلاۋدى ەقىۇ-نىڭ حالىقارالىق ستاندارتتارىنا سايكەس جانە باقىلاۋشىلاردىڭ قاداعالاۋىمەن وتكىزۋ» تالاپتارى قويىلعان.
«پلاتفورما 2025» رەزوليۋتسياسىنا سۇيەنە وتىرىپ، بەلارۋستىڭ دەموكراتيالىق كۇشتەرىنىڭ وكىلدەرى 26 قاڭتاردا وتەتىن شارادا اتالعان تالاپتار ورىندالماعان جاعدايدا سايلاۋ پروتسەسىنىڭ يميتاتسياسى دەپ ساناۋ كەرەكتىگىن مالىمدەدى.
