جەزقازعان قالاسىندا قۇرىلتاي دەپۋتاتتارىن سايلاۋ اياسىنداعى داۋىس بەرۋ جالعاسىپ جاتىر. تاڭعى ساعات 10:00-دە قالاداعى №28 سايلاۋ ۋچاسكەسىنە ۇلىتاۋ وڭىرىنە تانىمال اقساقال، ساياحاتشى سارسەنباي قوتىراشوۆ كەلىپ، ءوزىنىڭ ازاماتتىق تاڭداۋىن جاسادى.
ءومىرىنىڭ جەتپىستەن اسقان شاعىندا ۇزاق ساپارلارعا شىعىپ، قازاقستاندى جانە بىرنەشە شەت مەملەكەتتى جاياۋ ارالاعان سارسەنباي اقساقال ءۇشىن بۇل كۇننىڭ ءمانى ەرەكشە.
ساياحاتشى 2022 جىلى قازاقستاننىڭ 17 ءوڭىرىن جاياۋ ارالاپ، 8 مىڭ شاقىرىمعا جۋىق جول ءجۇرىپ وتكەن. بۇل جەتىستىگى وتاندىق كينەس رەكوردتار كىتابىنا ەنگىزىلدى. كەيىن ول حالىقارالىق جورىقتارىن جالعاستىرىپ، بىرنەشە مەملەكەت اۋماعىن جاياۋ ەڭسەردى.
ال، بيىلعى جىلى سارسەنباي قوتىراشوۆ 53 كۇن ىشىندە سەربيا، ۆەنگريا، اۋستريا، گەرمانيا جانە فرانتسيا ارقىلى شامامەن 3 مىڭ شاقىرىم جول ءجۇرىپ، پاريجگە جەتتى. ونىڭ تاباندىلىعى مەن بەلسەندى ءومىر سالتى كوپتەگەن قازاقستاندىققا ۇلگى بولىپ وتىر.
ساياحاتشىنىڭ ايتۋىنشا، ەلدى جاياۋ ارالاۋ وعان قازاقستاننىڭ ءار وڭىرىندەگى حالىقتىڭ تىنىس-تىرشىلىگىن، سالت-ءداستۇرى مەن ەل ازاماتتارىنىڭ ارمان-ماقساتىن جاقىننان تانۋعا مۇمكىندىك بەرگەن.
«ەلدىڭ بولاشاعى ءار ازاماتتىڭ تاڭداۋىنا بايلانىستى. سوندىقتان داۋىس بەرۋ – جاي عانا مىندەت ەمەس، ەل الدىنداعى ازاماتتىق جاۋاپكەرشىلىك»، – دەدى سارسەنباي اقساقال.
ول داۋىس بەرۋ ۋچاسكەسىنە كەلگەن ازاماتتارعا اق باتاسىن بەرىپ، ەلدىڭ بىرلىگى مەن بەرەكەسىن، جاستاردىڭ بولاشاعى جارقىن بولۋىن تىلەدى.
ايتا كەتەيىك، سارسەنباي قوتىراشوۆقا 2026 جىلى قازاقستاننىڭ تۋريزم سالاسىنا قوسقان ۇلەسى مەن بەلسەندى ءومىر سالتىن ناسيحاتتاعانى ءۇشىن «قۇرمەتتى سپورت قىزمەتكەرى» اتاعى تابىستالدى.
قازىرگى ۋاقىتتا №28 سايلاۋ ۋچاسكەسىندە داۋىس بەرۋ پروتسەسى جالعاسىپ جاتىر. سايلاۋ ۋچاسكەلەرى ساعات 20:00-گە دەيىن جۇمىس ىستەيدى.
