الماتى وبلىسىندا وتكەن Basqaru Race Nation Kazakhstan 2026 جارىسىنا ەلىمىزدەن جانە باسقا دا مەملەكەتتەردەن كەلگەن شامامەن 1800 ادام قاتىستى. ولار ارقانمەن ورمەلەپ، بيىك قابىرعالاردان اسىپ، لاي مەن سۋدى ەڭسەرىپ، كۇش-جىگەردى تالاپ ەتەتىن ءتۇرلى كەدەرگىلەردەن ءوتتى. سايىس بيىك ورلەرى بار تاۋلى جەردە ۇيىمداستىرىلدى.
الماتى وبلىسىنىڭ ەرىكتىلەرى مەن بەلسەندى جاستارى تراسسانىڭ جەكەلەگەن ۋچاسكەلەرىندە كەزەكشىلىك ەتىپ، كۇردەلى كەدەرگىلەردەن وتكەن سپورتشىلارعا كومەكتەستى. قاجەت بولعان جاعدايدا قاتىسۋشىلاردىڭ جاعدايى تۋرالى اقپاراتتى مەديتسينا قىزمەتكەرلەرىنە حابارلاپ، ولاردى اۋىز سۋمەن قامتاماسىز ەتتى.
ايتا كەتەيىك، اۋىز سۋ بوتەلكەلەرىندە 23 تامىزدا قۇرىلتاي دەپۋتاتتارىنىڭ سايلاۋى وتەتىنى تۋرالى اقپارات ورنالاستىرىلعان. ەرىكتىلەر جارىسقا قاتىسۋشىلار مەن ءىس-شارا قوناقتاردىڭ سايلاۋعا قاتىستى سۇراقتارىنا دا جاۋاپ بەردى. وسىلايشا، اۋقىمدى سپورتتىق شارا تۇرعىنداردى قۇرىلتاي دەپۋتاتتارىنىڭ سايلاۋى تۋرالى اقپاراتتاندىرۋعا ارنالعان قوسىمشا الاڭعا اينالدى.
جارىس بارىسىندا قاتىسۋشىلار مەن قوناقتارعا 23 تامىزدا وتەتىن قۇرىلتاي دەپۋتاتتارىنىڭ سايلاۋى تۋرالى اقپارات باسىلعان اۋىزسۋ تاراتىلدى. وسىلايشا بۇقارالىق سپورتتىق ءىس-شارا ءوڭىر تۇرعىندارى مەن قوناقتارىن داۋىس بەرۋ كۇنىنەن حاباردار ەتتى.
جارىس 5 جانە 10 شاقىرىمدىق قاشىقتىقتار بويىنشا ۇيىمداستىرىلدى. ەڭ كۇردەلى سىناقتار 10 شاقىرىمدىق تراسسادا جالعاستى، مۇندا سپورتشىلار 50-گە جۋىق ءتۇرلى كەدەرگىدەن وتۋگە ءتيىس بولدى.
بالالار ءۇشىن دە جەكە كەدەرگىلەر جولاعى ۇيىمداستىرىلدى. 7-10 جاس ارالىعىنداعى قاتىسۋشىلار 1 شاقىرىم، ال 11-14 جاستاعىلار كۇردەلىرەك ەلەمەنتتەرى بار 2 شاقىرىمدىق قاشىقتىقتى ەڭسەردى. 15 جاستان اسقان جاسوسپىرىمدەر 3 شاقىرىمدىق ەرەسەكتەرگە ارنالعان ديستانتسياعا شىعا الدى. ۇيىمداستىرۋشىلار اتا-الالاردىڭ كەلىسىمىمەن دايىندىعى جاقسى بۇلدىرشىندەردىڭ دە جارىسقا قاتىسۋىنا مۇمكىندىك بەردى. وسىلايشا، ەڭ جاس قاتىسۋشىسى شامامەن بەس جاستا بولدى.
بۇل جارىس ءوڭىردىڭ تۋريزم سالاسى ءۇشىن دە ماڭىزدى وقيعاعا اينالدى. الماتى وبلىسىنىڭ تۋريزم باسقارماسى مۇنداي اۋقىمدى سپورتتىق ءىس-شارالار وڭىردەگى سپورتتىق جانە وقيعالىق ءتۋريزمنىڭ دامۋىنا سەرپىن بەرەتىنىن اتاپ ءوتتى. ويتكەنى جارىسقا سپورتشىلارمەن بىرگە ولاردىڭ وتباسى مۇشەلەرى مەن جانكۇيەرلەرى دە تۋريست رەتىندە كەلەدى.
جارىستا 5 جانە 10 شاقىرىمدىق قاشىقتىقتار بويىنشا جەڭىمپازدار انىقتالدى. «Elite 10» ساناتىندا 18-39 جاس ارالىعىنداعى ەرلەر اراسىندا ءبىرىنشى بولىپ 1:16:39 ۋاقىتتا رەسەيدەن كەلگەن دميتري گورەۆ مارەگە جەتتى. ودان قازاقستاندىق الماس راحىمباەۆ نەبارى 59 سەكۋندقا قالىپ، 1:17:38 ناتيجەسىمەن ەكىنشى ورىن الدى. ءۇشىنشى ورىنعا ءالي راحمەتوۆ يە بولدى، ول 1:19:54 ۋاقىتتا كەلدى. ايەلدەر اراسىندا ەڭ ۇزدىك ناتيجەنى اناستاسيا الەكسەەۆا كورسەتتى، ول 2:10:25 ۋاقىتتا جارىس مارەسىن سىزدى.
«Elite 5» ساناتىندا ەرلەر اراسىندا قىرعىزستان وكىلى ارسەني شاشيچەۆ 59:55 ناتيجەسىمەن جەڭىسكە جەتتى. قازاقستاندىق دارحان سۇيىمباەۆ 1:00:53 ناتيجەسىمەن ەكىنشى ورىن السا، ءاشىم جۇمابەكوۆ 1:03:20 ناتيجەسىمەن ءۇشىنشى ورىننان كورىندى. ايەلدەر اراسىندا قاشىقتىقتى ەڭ جىلدام باعىندىرعان قازاقستاندىق ولەسيا گريازنوۆا بولدى، ول 2:17:25 ۋاقىتتا كەلدى.
«Elite 10 (40+)» ساناتىندا ەرلەر اراسىندا جەڭىستى يلناز باسىروۆ 1:25:31 ناتيجەسىمەن جەڭىپ الدى. ايەلدەر اراسىندا اناستاسيا تسەحوتسكايا 2:34:37 ناتيجەسىمەن ۇزدىك اتاندى. 5 شاقىرىمدىق كوماندالىق جارىستا Sprint Club Almaty, ال 10 شاقىرىمدىق كوماندالىق سايىستا Jaubasar Almaty جەڭىمپاز بولدى.
Basqaru Race Nation Kazakhstan 2026 جارىسىنىڭ جالپى جۇلدە قورى 3 ميلليون تەڭگەنى قۇرادى. ءىس-شارانى «ەكسترەمالدى اتلەتيكا» قوعامدىق بىرلەستىگى ۇيىمداستىردى.
جالپى Race Nation جارىسى قازاقستاندا 2017 جىلدان بەرى وتكىزىلىپ كەلەدى. وسى ۋاقىت ىشىندە كەيبىر قاتىسۋشىلار بالالار اراسىنداعى جارىستاردان باستاپ، تولىققاندى ەرەسەكتەر اراسىنداعى باسەكەلى قاشىقتىقتارعا دەيىنگى جولدان ءوتتى.
ەسكە سالايىق، 23 تامىزدا قازاقستاندا ەلىمىزدىڭ جاڭا پارلامەنتى — قۇرىلتاي دەپۋتاتتارىنىڭ سايلاۋى وتەدى.
