ارقالىق قالاسىنداعى اۋەجايدىڭ قۇرىلىسى اياقتالدى. بۇل تۋرالى بۇگىن، 21 تامىزدا قوستاناي وبلىسىنىڭ اكىمى قۇمار اقساقالوۆ جازدى، دەپ حابارلايدى «ادىرنا» ءتىلشىسى.
ايتۋىنشا، اۋەجايدىڭ اۆياتسيالىق قاۋىپسىزدىك قىزمەتى 3 تامىزدا №8/26 سەرتيفيكاتىن السا، 18 تامىزدا «قازاەروناۆيگاتسيا» رمك-عا اەروناۆيگاتسيالىق قىزمەتتەردى جەتكىزۋشى رەتىندە №21 سەرتيفيكات بەرىلگەن. ال 21 تامىزدا ارقالىق اەرودرومىنا ارد سەريالى №KZ01VKC00000389 جارامدىلىق سەرتيفيكاتى راسىمدەلگەن.
قازىرگى ۋاقىتتا اۋەجاي CRJ200 ۇلگىسىندەگى وڭىرلىك جولاۋشىلار ۇشاقتارىن قابىلداپ، ولارعا قىزمەت كورسەتۋگە دايىن. بايقاۋ قورىتىندىسى بويىنشا اۋە باعىتتارىنىڭ جەڭىمپازى «SCAT» اۋە كومپانياسى» اق اتانعان.
العاشقى اۋە رەيسىن ارقالىق اۋەجايى 22 تامىزدا قابىلداۋى جوسپارلانعان. ال 1 قىركۇيەكتەن باستاپ تۇراقتى رەيستەر ورىندالادى.
رەيستەر ءار سەيسەنبى جانە سەنبى كۇندەرى الماتى – ارقالىق – قوستاناي – ارقالىق – استانا باعىتتارى بويىنشا جۇزەگە اسىرىلادى.
«ارقالىق اۋەجايىنىڭ قايتا ىسكە قوسىلۋى – تورعاي ءوڭىرىنىڭ كولىك قولجەتىمدىلىگىن ارتتىرىپ، ەلدى مەكەندەردىڭ الەۋمەتتىك-ەكونوميكالىق دامۋىنا جاڭا مۇمكىندىك بەرەتىن ماڭىزدى قادام. قۇتتى بولسىن!»– دەدى وبلىس اكىمى.
