تورعاي تورىندەگى ارقالىق قالاسى بيىل 70 جىلدىق مەرەيتويىن اتاپ وتۋدە. بۇل بەلەس ءوڭىردىڭ الەۋمەتتىك-ەكونوميكالىق دامۋىنا جاڭا سەرپىن بەرىپ، سوڭعى جىلدارى قولعا الىنعان اۋقىمدى جوبالاردى سارالاۋعا دا مۇمكىندىك بەرىپ وتىر. مەملەكەت باسشىسى قاسىم-جومارت توقاەۆ ءوز جولداۋىندا ۇكىمەتتىڭ ەرەكشە نازارىن تورعاي ءوڭىرىنىڭ الەۋمەتتىك-ەكونوميكالىق دامۋىنا اۋدارۋ قاجەتتىگىن اتاپ وتكەن ەدى. بۇگىندە وسى تاپسىرما اياسىندا ينفراقۇرىلىمدى جاڭعىرتۋ، كولىك-لوگيستيكالىق مۇمكىندىكتەردى كەڭەيتۋ، ينۆەستيتسيا تارتۋ باعىتىنداعى جۇمىستار جۇيەلى تۇردە جالعاسىپ كەلەدى.
مەملەكەت باسشىسىنىڭ تاپسىرمالارى اياسىندا تورعاي ءوڭىرىنىڭ الەۋمەتتىك-ەكونوميكالىق الەۋەتىن ارتتىرۋعا باعىتتالعان جۇمىستار كەزەڭ-كەزەڭىمەن جۇزەگە اسىرىلىپ كەلەدى. بۇگىندە نەگىزگى باسىمدىقتاردىڭ قاتارىندا كولىك بايلانىسىن كۇشەيتۋ، ينجەنەرلىك جەلىلەردى جاڭارتۋ، ينۆەستيتسيا تارتۋ جانە تۇرعىندارعا قولايلى ورتا قالىپتاستىرۋ بار. بۇل باعىتتاعى وزگەرىستەر ارقالىقتىڭ عانا ەمەس، تۇتاس ءوڭىردىڭ بولاشاعىنا اسەر ەتەتىن جوبالارمەن ساباقتاسىپ جاتىر.
سونىڭ ءبىر ايعاعى — جاڭا اۋەجاي قۇرىلىسىنىڭ اياقتالۋى. ساعاتىنا 70 جولاۋشىعا دەيىن قابىلدايتىن نىسان تورعايدىڭ كولىك قولجەتىمدىلىگىن ارتتىرىپ، 80 مىڭنان استام تۇرعىن ءۇشىن جاڭا مۇمكىندىك اشادى. جوبا اياسىندا 136 جاڭا جۇمىس ورنى قۇرىلادى.
ءوڭىردىڭ كولىك كارتاسى مۇنىمەن شەكتەلمەيدى. «جەزقازعان – ارقالىق – پەتروپاۆل» اۆتوجولىن رەكونسترۋكتسيالاۋ جالعاسىپ جاتسا، «ورتالىق – باتىس» ستراتەگيالىق ماگيسترالى ەلدىڭ ورتالىعى مەن باتىسىن بايلانىستىراتىن ماڭىزدى باعىتتاردىڭ بىرىنە اينالماق. جولدىڭ جاقسارۋى — تەك قاتىناستىڭ جەڭىلدەۋى ەمەس، جاڭا وندىرىستەر مەن كاسىپكەرلىك باستامالارعا، تاۋار اينالىمى مەن ينۆەستيتسياعا جول اشاتىن مۇمكىندىك.
تەمىرجول ينفراقۇرىلىمى دا جاڭعىرتىلدى. كۇردەلى جوندەۋدەن وتكەن ۆوكزال قايتا پايدالانۋعا بەرىلىپ، جاڭا ۆاگونداردان جاساقتالعان «نۇرلى جول — ارقالىق» پويىزى قاتىناي باستادى. مۇنداي جوبالار شالعاي جاتقان اۋماقتاردىڭ ەلدىڭ وزگە وڭىرلەرىمەن بايلانىسىن كۇشەيتىپ، ەكونوميكالىق بەلسەندىلىكتىڭ ارتۋىنا ىقپال ەتەدى.
ينفراقۇرىلىمدىق جاڭعىرۋ ينجەنەرلىك جۇيەلەردى دە قامتىپ وتىر. 2023 جىلدان بەرى 17,3 شاقىرىم جىلۋ جەلىسى جاڭارتىلىپ، ولاردىڭ توزۋ دەڭگەيى 90 پايىزدان 50 پايىزعا دەيىن تومەندەگەن. جىلۋ شىعىنى 32 پايىزدان 22,1 پايىزعا ازايدى. ال جىلۋ ەلەكتر ورتالىعىن قاتتى وتىنعا كوشىرۋ وتىن شىعىنىن ەكى ەسەگە قىسقارتىپ، جىل سايىن شامامەن 2 ملرد تەڭگە ۇنەمدەۋگە مۇمكىندىك بەردى.
الەۋمەتتىك ينفراقۇرىلىمنىڭ جايى دا نازاردان تىس قالعان جوق. سوڭعى جىلدارى 22,2 مىڭ شارشى مەتر تۇرعىن ءۇي سالىنىپ، 63 اۋلا اباتتاندىرىلدى، 51 بالالار جانە سپورت الاڭى ورناتىلدى. 50-دەن استام كوشە جوندەلىپ، سىرتقى جارىقتاندىرۋ جۇيەسى جاڭعىرتىلدى. اۋىلدىق ەلدى مەكەندەردى ساپالى ينتەرنەتپەن قامتۋ جۇمىستارى دا جالعاسىپ كەلەدى.
ال ءوڭىردىڭ ەكونوميكالىق تىنىسىن كەڭەيتەتىن نەگىزگى تەتىكتىڭ ءبىرى — ينۆەستيتسيا. سوڭعى جىلدارى تورعاي وڭىرىنە 110 ملرد تەڭگەدەن استام ينۆەستيتسيا تارتىلىپ، ونىڭ شامامەن 70 پايىزى جەكە ينۆەستيتسيالارعا تيەسىلى بولعان.
قازىر اگروونەركاسىپ كەشەنىندە بىرنەشە ءىرى جوبا قولعا الىنعان. قۇس فابريكاسىن جاڭعىرتۋ، جاڭا قۇس قورالارى مەن جەم زاۋىتىن سالۋ، 10 مىڭ باسقا ارنالعان قوي كەشەنى مەن 6 مىڭ باسقا ارنالعان بورداقىلاۋ الاڭىن ىسكە قوسۋ جوسپارلانىپ وتىر. بۇل جوبالار ءوندىرىس كولەمىن ۇلعايتۋمەن قاتار، جاڭا جۇمىس ورىندارىن اشىپ، ءوڭىر ەكونوميكاسىن ارتاراپتاندىرۋعا مۇمكىندىك بەرەدى.
قوستاناي وبلىسىنىڭ اكىمى قۇمار اقساقالوۆ وڭىرگە ينۆەستيتسيا تارتۋ جۇمىستارى جۇيەلى تۇردە جالعاسىپ جاتقانىن اتاپ ءوتتى.
— مەملەكەت باسشىسىنىڭ تاپسىرماسىنا سايكەس، ارقالىققا ينۆەستيتسيا تارتۋعا قاجەتتى جاعدايلاردى بىرتىندەپ قالىپتاستىرىپ كەلەمىز. سوڭعى جىلدارى ەكونوميكاعا 110 ملرد تەڭگەدەن استام ينۆەستيتسيا تارتىلدى، ونىڭ 70 پايىزىنا جۋىعى — جەكە ينۆەستيتسيالار. بۇگىندە اگروونەركاسىپ كەشەنىندە جاڭا جۇمىس ورىندارىن اشىپ، تورعاي ءوڭىرىنىڭ ەكونوميكاسىنا قوسىمشا سەرپىن بەرەتىن ءىرى جوبالار جۇزەگە اسىرىلىپ جاتىر، — دەدى وبلىس اكىمى.
تورعايداعى بۇل جۇمىستار قوستاناي وبلىسىنىڭ جالپى دامۋ باعىتىمەن ۇندەس. وڭىردە ءوندىرىستى جاڭعىرتۋ، اۋىل شارۋاشىلىعىنىڭ الەۋەتىن ارتتىرۋ، ينۆەستيتسيا تارتۋ، كولىك جانە ينجەنەرلىك ينفراقۇرىلىمدى كۇشەيتۋ باعىتتارى قاتار ءجۇرىپ كەلەدى. ۇكىمەت بەكىتكەن 2026–2028 جىلدارعا ارنالعان تورعاي ءوڭىرىنىڭ الەۋمەتتىك-ەكونوميكالىق دامۋ جوسپارى دا وسى مىندەتتەردى ءبىر ارناعا توعىستىرعان.
ال وسى اۋقىمدى جۇمىستاردىڭ اياسىندا ارقالىق ءوزىنىڭ 70 جىلدىعىن اتاپ وتۋدە. مەرەيتويلىق باعدارلامادا XXXIX جازعى وبلىستىق سپارتاكيادا باستالىپ، سپورتتىڭ بىرنەشە تۇرىنەن جارىستار ءوتتى. مەملەكەت قايراتكەرى، تاريحشى-ەتنوگراف وزبەكالى جانىبەكوۆتىڭ 95 جىلدىعىنا ارنالعان ەسكە الۋ كەشى ۇيىمداستىرىلىپ، «شەرتەر» ءانسامبلى ونەر كورسەتتى. «ارقالىقتىڭ ارايلى تاڭى» سپەكتاكلى دە كورەرمەنگە جول تارتتى.
وسىلايشا، جەتى ونجىلدىق تاريحى بار ارقالىقتىڭ مەرەيتويى وتكەندى ۇلىقتاعان شارالارمەن عانا ەمەس، ءوڭىردىڭ بۇگىنگى وزگەرىستەرىمەن دە ساباقتاسىپ وتىر. تورعاي تورىندەگى جاڭا نىساندار مەن ينۆەستيتسيالىق جوبالار شالعاي ءوڭىردىڭ الەۋەتىن اشۋعا باعىتتالعان جۇمىستىڭ ناقتى كورىنىسىنە اينالسا، بۇل ۇدەرىس قوستاناي وبلىسىنىڭ ەكونوميكالىق مۇمكىندىكتەرىن كەڭەيتە تۇسۋدە.
