لوندونداعى حيتروۋ اۋەجايى ەلەكتر ستانتسياسىنداعى ورتكە بايلانىستى ءبىر كۇندىك ۇزىلىستەن كەيىن قايتادان رەيستەردى قابىلداپ، جونەلتە باستادى، دەپ حابارلايدى "ادىرنا" ۇلتتىق پورتالى.
بۇل تۋرالى اۋەجايدىڭ رەسمي پاراقشاسىندا حابارلاندى.
"حيتروۋ اۋەجايى ەلەكتر قۋاتىنىڭ كەشە ۇزىلگەنىنە قاراماستان، رەيستەردى قايتا قابىلداۋدا. ءبىز جاعدايدى رەتتەۋ ءۇشىن ۇزدىكسىز جۇمىس ىستەدىك جانە ەندى ۇشۋلاردى قاۋىپسىز تۇردە جالعاستىرامىز،" – دەلىنگەن حابارلامادا.
21 ناۋرىزدا اۋەجاي ماڭىنداعى حەيس اۋدانىندا ورنالاسقان ەلەكتر ستانتسياسىندا ءورت شىعىپ، حيتروۋ تولىقتاي توقتاتىلعان بولاتىن. اۋەجاي وكىلدەرىنىڭ ايتۋىنشا، اپات سالدارىنان اۋقىمدى اۋماقتا ەلەكتر ەنەرگياسى وشىرىلگەن.
توتەنشە جاعدايدى لوندوننىڭ تەرروريزمگە قارسى كۇرەس ءبولىمى تەرگەپ جاتىر. دەگەنمەن، قۇقىق قورعاۋ ورگاندارى قاساقانا ۇيىمداستىرىلعان ارەكەتتىڭ بەلگىسى جوق ەكەنىن حابارلادى.
ايتا كەتەيىك، حيتروۋ – الەمدەگى ەڭ ءىرى اۋەجايلاردىڭ ءبىرى. 2024 جىلى وندا رەكوردتىق 83,9 ميلليون جولاۋشى ساپارلاعان. اۋەجايدا ءار 45 سەكۋند سايىن ءبىر ۇشاق قونادى نەمەسە ۇشادى.
