بولگاريا بيلىگى «كوزلودۋي» اتوم ەلەكتر ستانتسياسىنىڭ جۇمىسىن شەكتەۋ تۋرالى شەشىم قابىلدادى. بۇل تۋرالى ەلدىڭ ەنەرگەتيكا مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«رەاكتور قۋاتىن 120 مەگاۆاتتقا تومەندەتۋ تۋرالى شەشىم دۋناي وزەنىندەگى سۋ دەڭگەيىنىڭ بۇرىن-سوڭدى بولماعان ءارى اسا كۇردەلى تومەندەۋىنە بايلانىستى قابىلدانىپ وتىر. بۇل – اەس-ءتىڭ قاۋىپسىز جۇمىسىن قامتاماسىز ەتۋگە باعىتتالعان شارالاردىڭ ءبىر بولىگى. بولگاريا اۋماعىنداعى دۋناي وزەنىندە سۋ دەڭگەيىنىڭ تومەندەۋ ءۇردىسى ساقتالۋدا»، – دەلىنگەن حابارلامادا.
بيلىك وكىلدەرىنىڭ مالىمەتىنشە، اەس تاريحىندا ەنەرگيا بلوگىنىڭ قۋاتىن ازايتۋ شاراسى ستانتسيانىڭ 52 جىلدىق جۇمىسىندا العاش رەت جۇزەگە اسىرىلماق.
11 تامىزدا بولگاريانىڭ ەنەرگەتيكا مينيسترلىگى اەس جۇمىسىنىڭ توقتاپ قالۋ قاۋپى بار ەكەنىن حابارلاعان ەدى. سول كەزدە شەنەۋنىكتەر ارقايسىسىنىڭ قۋاتى 1000 مەگاۆاتت بولاتىن ەكى رەاكتوردى سۋمەن قامتاماسىز ەتۋ ءۇشىن قاجەتتى شارالار قابىلدانعانىن مالىمدەگەن.
اەس باسشىلىعىنىڭ بۇرىنعى وكىلدەرىنىڭ ءبىرى گەورگي كاشتيەۆتىڭ ايتۋىنشا، وزەندەگى سۋ دەڭگەيى تاعى 10–12 سانتيمەترگە تومەندەسە، ەلەكتر ەنەرگياسىن ءوندىرۋ كولەمىن قىسقارتۋعا تۋرا كەلۋى مۇمكىن. ال سۋ دەڭگەيى 20 سانتيمەترگە تومەندەگەن جاعدايدا «كوزلودۋي» اتوم ەلەكتر ستانتسياسىنىڭ جۇمىسى تولىق توقتاتىلۋى ىقتيمال.
