قازاقستان پرەمەر-ءمينيسترى ولجاس بەكتەنوۆ پەن ونىڭ ورىنباسارلارىنا ەلىمىزدىڭ قاي جەرىندە دەمالعان ۇنايدى؟ بۇگىن ۇكىمەتتە پرەمەر-ءمينيستردىڭ باق وكىلدەرىمەن العاشقى بريفينگى ءوتتى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
جۋرناليستەردىڭ ءبىرى بەكتەنوۆتەن قازاقستانداعى ءتۋريزمدى دامىتۋ ماسەلەسىن سۇرادى. ۇكىمەت باسشىسى بۇل سالادا پروبلەمالار بارىن مويىندادى.
"كوپتەگەن كۋرورتتىق ايماقتار، دەمالىس ورىندارى تەك الەمدىك ستاندارتتارعا ەمەس، قاۋىپسىزدىك پەن جايلىلىققا قويىلاتىن نەگىزگى تالاپتارعا دا سايكەس كەلمەيدى. بۇل باعىتتا جۇمىس جۇرگىزىلەدى. وكىنىشكە قاراي، بىزدە ءبىر دەرت بار – ءاردايىم جاعاجاي ماۋسىمىنا دايىن ەكەنى تۋرالى ادەمى ەسەپتەر كەلەدى. ال ءىس جۇزىندە ولاي بولماي شىعادى. ۇكىمەت تاراپىنان كەمشىلىك بار ەكەنىن مويىندايمىز", – دەدى ولجاس بەكتەنوۆ.
وسىدان كەيىن پرەمەر-مينيستردەن سوڭعى رەت قازاقستاندا قاشان جانە قايدا دەمالعانى سۇرالدى. بەكتەنوۆ 2021 جىلدان بەرى دەمالىس الماعانىن ايتتى.
"قاي جەردە ناقتى بولعانىمدى ءدال ەسىمە تۇسىرە الماي تۇرمىن: بۋرابايدا ما، الدە الاكولدە مە... 2021 جىلى الاكولدە بولدىم. سودان بەرى دەمالىس بولعان جوق، سوندىقتان ەشقايدا شىقپادىم. ەڭ جاقىنى – بۋرابايعا دا بارىپ ۇلگەرمەي ءجۇرمىن. جۇمىس ساپارىمەن كەندەرلىدە (ماڭعىستاۋ وبلىسى – ەسك.), الاكولدە بولدىم، بىراق شومىلعان جوقپىن، جاعدايدى كورىپ قايتتىم", – دەدى پرەمەر.
ءتورت ۆيتسە-پرەمەر دە وسى سۇراققا جاۋاپ بەردى.
"مەن دە، وكىنىشكە قاراي، كوپتەن بەرى دەمالىسقا شىققان جوقپىن. بىراق، ارينە، ءوزىمىزدىڭ... پاۆلوداردى، باياناۋلدى قاتتى جاقسى كورەمىن. بۇل – مەنىڭ سۇيىكتى جەرلەرىم", – دەدى رومان سكليار جۋرناليستكە قاراتا.
ۆيتسە-پرەمەر ەرمەك كوشەرباەۆ سوڭعى رەت دەمالىستا شىعىس قازاقستان وبلىسىنىڭ اكىمى بولعان كەزىندە شىققانىن ايتتى.
"بىلتىر، اكىمدىكتە جۇمىس ىستەپ جۇرگەندە، 7 كۇندىك دەمالىس بولدى. سونىڭ 4 كۇنى ەۋروپاعا باردىم، ال قالعان 4 كۇنى، جەكسەنبىنى قوسا العاندا، وتباسىممەن بىرگە بۇقتىرمادا (شقو – ەسك.), "پريمورسك" دەمالىس ايماعىندا، ۇلكەن نارىن اۋدانىندا بولدىم", – دەدى كوشەرباەۆ.
پرەمەردىڭ ورىنباسارى سەرىك جۇمانعارين دە سوڭعى ەكى جىلدا دەمالىس الماعانىن ايتتى.
"سوڭعى ەكى جىلدا دەمالعان جوقپىن. سوڭعى رەت... جاڭا جىلدا. جاڭا جىلدى اقكولدە وتكىزدىك. وتە جاقسى جەر", – دەدى ول.
قانات بوزىمباەۆ بىلتىرعى جازعى دەمالىسىنان سۋ تاسقىنىنا بايلانىستى باس تارتۋعا تۋرا كەلگەنىن ايتتى.
ء"يا، بىلتىر سۋ تاسقىنىنا بايلانىستى جازدا دەمالىس بولمادى، بىراق دەمالىس كۇندەرى اقتاۋدا، جىلى جاعاجاي اۋدانىندا ەكى كۇن بولدىم. ال ءبىر دەمالىسىم جەتىسۋداعى الاكولدە ءوتتى. كەرەمەت دەمالىس بولدى", – دەدى ۆيتسە-پرەمەر.
